مالیگاؤں میں منماڑ روڈ پر ایک دلخراش حادثہ پیش آیا جس میں 2 افراد ہلاک ہوگئے۔ اطلاع کے مطابق اس حادثے میں تبلیغی جماعت سے وابستہ دو ارکان فوت ہوگئے۔ سڑک حادثہ اتنا شدید تھا کہ دونوں کی موقع پر ہی موت ہوگئی جبکہ دیگر ارکان محفوظ رہے۔
اس سلسلہ میں سماجی کارکن شفیق شیخ نے نمائندے ای ٹی وی بھارت کو بتایا کہ آج دوپہر مالیگاؤں شاہی مسجد سے دہلی کے لیے تبلیغی جماعت کا ایک قافلہ بذریعہ کار منماڑ روانہ ہوا، لیکن مالیگاؤں سے کچھ کلومیٹر فاصلہ پر یہ کار حادثے کا شکار ہوگئی۔
انہوں نے بتایا کہ منماڑ سے مالیگاؤں آنے والا ایک تیز رفتار ٹرک اور کار میں زبردست تصادم ہوا جس کے سبب کار کئی فٹ دور جاگری۔ یہ حادثہ اتنا شدید تھا کہ موقع پر ہی تبلیغی جماعت کے دو ساتھیوں کی موت ہوگئی۔ مہلوک کی شناخت 36 سالہ حافظ مغیث الرحمٰن سراج احمد اور 25 سالہ عبدالباسط عبدالرشید کے طور پر کی گئی۔ حادثہ میں مزید 3 افراد شدید طور پر زخمی ہوگئے جنہیں شہر کے ایک اسپتال کو منتقل کیا گیا۔
یہ بھی پڑھیں: جمعیت اہل حدیث کے جلسے میں علماء کرام کا خطاب
واضح رہے کہ تمام قانونی تکمیل کے بعد لاشوں کو اہل خانہ کے حوالے کردیا گیا۔ اس حادثے کی خبر سے شہر میں دکھ اور غم کا ماحول ہے جب کہ اس معاملے میں قانونی معاونت میں شہر کے سماجی کارکنان موجود تھے۔
