مالیگاؤں: لاک ڈاؤن کی مخالفت میں عوام سڑکوں پر

مہاراشٹر کے مسلم اکثریتی شہر مالیگاؤں میں کورونا کے کیسز میں اضافے کے سبب مقامی انتظامیہ نے لاک ڈاؤن کا اعلان کیا ہے۔ اس کے بعد عوام اس کی مخالفت کرتے ہوئے سڑکوں پر دھرنا دے رہے ہیں۔

مہاراشٹر کے معروف شہر مالیگاؤں قدوائی روڈ بازار علاقے میں مسلم کاروباریوں اور کانگریس پارٹی کارکنان نے لاک ڈاؤن کی مخالفت کرتے ہوئے احتجاج کیا اور ہاتھوں میں 'نو لاک ڈاؤن' کے بینر لے کر حکومت اور انتظامیہ کے خلاف نعرے بازی کی۔

مالیگاؤں میں مکمل لاک ڈاؤن کے دوران صرف ایمرجنسی و ضروری خدمات جاری رکھنے کے اعلان کے بعد کانگریس کے مقامی صدر شیخ رشید نے حکومت و انتظامیہ سے مطالبہ کیا ہے کہ' مکمل لاک ڈاؤن کی وجہ سے غریبوں کو کافی پریشانیوں کا سامنا کرنا پڑتا ہے اس لیے حکومت کو چاہیے کہ وہ ان پریشانیوں کو ذہن میں رکھ کر لاک ڈاؤن جیسے فیصلے پر نظر ثانی کرے'۔

شیخ رشید نے کہا کہ'حکومت کو پہلے ایسے مزدوروں، رکشہ ڈرائیورز اور دیگر خوانچہ فروشوں کو مالی امداد فراہم کرنی چاہیے جن کا لاک ڈاؤن کی وجہ سے سب کچھ ختم ہوچکا ہے۔ انہوں نے کہا کہ' شہر مالیگاؤں میں لاک ڈاؤن کے باوجود حکومت نے کوئی مالی تعاون مزدوروں کو فراہم نہیں کیا ہے۔ پہلے حکومت ان کے اکاؤنٹ میں ماہانہ 5 ہزار امداد فراہم کرے اس کے بعد لاک ڈاؤن جیسا قدم اٹھائے۔