مہاراشٹر کے شہر مالیگاؤں میں آج رکن اسمبلی مفتی محمد اسمعیل نے جنرل ہسپتال کا ہنگامی دورہ کیا جہاں انہوں نے ہسپتال کے انچارج ڈاکٹر مہالے اور اسپتال انتظامیہ کے ساتھ ایک جائزہ میٹنگ کی۔
اس میٹنگ میں رکن اسمبلی مفتی محمد اسمعیل نے اسپتال کو ایم ایل اے فنڈ سے دیے گئے دیڑھ کروڑ روپے کی تفصیلات طلب کیں۔ اس کے علاوہ گذشتہ ماہ کی کارکردگی کا جائزہ لیا۔ انہوں نے اس سلسلہ میں اسپتال انتظامیہ سے رپورٹ بھی طلب کی۔
جائزہ رپورٹ حاصل کرنے کے بعد انہوں نے اسپتال انتظامیہ کی سراہنا کی اور مزید بہتر خدمات انجام دینے اور اپنے فرائض کو بخوبی انجام دینے کا مشورہ دیا۔ انہوں نے مریضوں کے ساتھ بھی بہتر سلوک روا رکھنے کی اپیل کی۔
مفتی محمد اسمعیل نے کہا کہ جنرل اسپتال میں ڈیلیوری کے لیے آنے والی خواتین کے رشتہ داروں سے اسٹاف اور نرسز کی جانب سے رقم کا مطالبہ کرنے کی شکایات بھی موصول ہورہی ہیں۔ انہوں نے اس طرح کی سرگرمیوں کی روک تھام پر زور دیا اور انتظامیہ کو خاطیوں کے خلاف سخت کارروائی کرنے کی ہدایت دی۔
ایک سوال کے جواب میں انہوں نے بتایا کہ وہ ہر ماہ جنرل اسپتال کا دورہ کریں گے اور انتظامات کا جائزہ لیں گے۔ اس کے علاوہ اسپتال انتظامیہ کو درپیش مسائل کے حل اور اسپتال میں ضروری سہولیات کی فراہمی کےلیے کوشش کریں گے۔
واضح رہے کہ اجلاس کے دوران ایم ایل اے فنڈ سے متعلق تفصیلات پیش کی گئیں۔ تفصیلات میں بتایا گیا کہ اب تک 10 ہزار ڈسپوز ایبل پلاسٹک گلوز، ایک ہزار انجکشن، دو ہزار پانچ سو پی پی ای کٹ، ایک لاکھ پیراسیٹامال ٹیبلیٹ، پانچ ہزار ہائیڈروسی کلوگزی، 12 نیبو لائزر مشینیں، ایک وینٹیلیٹر ( بڑوں کیلئے) اور دیگر اشیا موصول ہوئی ہیں تاہم 40 تا 50 لاکھ روپے کے مزید سامان بہت جلد موصول ہونے کی امید ہے۔
یہ بھی پڑھیں:
مالیگاؤں: مفتی محمد اسماعیل قاسمی نے دو سالہ کارکردگی پر رپورٹ پیش کی
اسپتال انتظامیہ نے رکن اسمبلی مفتی محمد اسمعیل کا استقبال کیا اور انہیں مکمل تفصیلات سے واقف کروایا۔ ملازمین نے بہتر طریقے سے خدمات کی انجام دہی کی یقین دہائی کرائی۔
