وزیربرائے پارلیمنٹری امورانل پرب نے ایوان میں کہا کہ بجٹ اجلاس 24فروری سے شروع ہوا تھا اور20مارچ تک چلنے والا تھا لیکن اب اس کا اختتام سنیچر کو ہو جائے گا۔
قابل ذکر ہے کہ ملک میں کورونا کے 73پازیٹیو معاملے سامنے آچکے ہیں۔ مہاراشٹر میں 11 لوگوں میں کورونا کی تصدیق ہوئی ہے۔
ریاست کے پارلیمینٹری امور کے وزیر انل پرب نے بجٹ اجلاس وقت سے پہلے ختم کرنے کے وزراء کے فیصلے کا اعلان ایوان اسمبلی میں کیا۔ اس تعلق سے ایوان میں ایک تجویز رکھی گئی تھی جسے ارکان نے منظوری دے دی۔
انل پرب نے کہا کہ چھ مارچ کو پیش کیا گیا ریاست کا بجٹ اور اختیاری بجٹ سنیچر کو پاس کیے جائیں گے۔
نائب وزیراعلی اجیت پوار نے کہا لوگوں کی صحت زیادہ ضروری ہے اور ارکان اسمبلی کو اپنے اپنے انتخابی حلقہ میں جانا چاہیے۔
واضح رہے کہ کورونا کے سب سے زیادہ 17معاملے کیرل میں سامنے آئے ہیں، اترپردیش میں بھی 10کورونا کے معاملے آئے ہیں۔ دہلی میں 6معاملوں کی تصدیق ہوئی ہے۔
چین سے پوری دنیا میں لگاتار پھیل رہے کورونا وائرس کو عالمی ادارہ صحت نے وبائی مرض قرار دیا ہے۔
منگل کو جن چھ نئے لوگوں میں کورونا کے اثرات پائے گئے ان میں تین نے دوبئی کے راستے امریکہ کا سفر کیا تھا دو لوگوں نے دبئی کی جبکہ ایک نے لندن کے ہیتھرو ہوائی اڈے سے فلائٹ پکڑ کر امریکہ کا سفر کیا تھا ان میں چار لوگ بینگلورو جبکہ دو لوگ پونہ میں ہیں۔ ہندوستان میں ان لوگوں کے رابطہ میں آنے والے لوگوں کو آئیسولیشن وارڈ میں رکھا گیا ہے۔
