واضح رہے کہ شہریت ترمیمی قانون کے خلاف ملک بھر میں احتجاجی مظاہرے ہورہے ہیں جہاں ہر طبقے اور ہر صنعت سے وابستہ افراد شامل ہوکر اس کی مخالفت کررہے ہیں اور اسے بھارتی آئین کے خلاف بتارہے ہیں، مظاہرین مذکورہ قانون کو واپس لینے کا مطالبہ بھی کررہے ہیں'۔
اسی ضمن میں ممبئی کے اگست کرانتی میدان میں احتجاج کی کال دی گئی تھی جہاں بالی وڈ کے متعدد اداکاروں نے شرکت کی اور اپنا احتجاج درج کرایا۔
اس موقع پر صحافیوں سے بات چیت کرتے ہوئے معروف اداکار جاوید جعفری نے کہا کہ' بہت سے ایسے مسائل ہیں جس پر حکومت سنجیدہ نہیں ہے لیکن ایسی باتیں جن سے عوام کے دل میں تفرت پیدا ہو بھائی چارہ میں تفریق پیدا ہو ایسے کام حکومت ضرور کرتی ہے'۔
انہوں نے کہا کہ' بھارت کا آئین جو بنا تھا وہ دنیا میں سب سے خوبصورت آئین تھا، آج ہمارے آئین کی روح پر حملہ ہورہا ہے، اس کے خلاف مہم چلانا بہت ضروری ہے'۔
انہوں نے کہا کہ' جس طرح ہمارے طلبا نے اس کی مخالفت کی ہے اس کی بالکل حمایت کرنی چاہیے'۔
انہوں نے ایک سوال کے جواب میں کہا کہ' اکثر لوگ یہ کہتے ہیں کہ آپ سیاست پر کیوں بولتے ہیں، تو میں ان سے کہنا چاہتا ہوں کہ اگر مجھے ووٹ ڈالنے کا حق ہے تو مجھے سیاست پر بولنے کا بھی حق ہے'۔
انہوں نے مزید کہا کہ' ہمیں کامیابی تبھی ملے گی جب اس قانون کو واپس لیا جائے گا'۔
