وزیر تعلیم ورشا گائیکواڈ نے اتوار کو ٹویٹر پر پیغام بھیج کر مطلع کیا کہ ایچ ایس سی کے امتحانات 15 اپریل کے بعد سے اور ایس ایس سی کے یکم مئی کے بعد شروع ہوں گے۔ انہوں نے کہا کہ حکومت صحت افسران سے پانچویں سے آٹھویں جماعت تک اسکولوں کو دوبارہ کھولنے کے امکانات پر مشورہ لے رہی ہے۔ اس پر جلد ہی فیصلہ کیا جائے گا۔
قابل ذکر ہے کہ مہاراشٹر اسٹیٹ بورڈ آف سیکنڈری اور ہائر سیکنڈری ایجوکیشن دسویں جماعت کے امتحانات فروری اور 12 ویں کے مارچ میں منعقد کرتا ہے لیکن اس سال کووڈ-19 کی بیماری کے سبب لاک ڈاون لگایا گیا جس کی وجہ سے ریاست کے اسکول اور کالج بند ہوئے اور گزشتہ دس ماہ سے طلباء آن لائن تعلیم حاصل کررہے ہیں۔
محترمہ گائیکواڈ کے اعلان کے بعد ممبئی پرنسپل ایسوسی ایشن(ایم پی اے) نے کہا ہے کہ امتحانات کو مزید آگے بڑھانا چاہیے تاکہ طالب علموں کو ان اہم امتحانات کی تیاری کے لیے مناسب موقع مل سکے۔
یو این آئی
