باندرہ معاملہ: افواہ پھیلانے والے اکاونٹس کی شناخت

مہاراشٹر سائبر ڈپارٹمنٹ نے ٹرین خدمات شروع ہونے سے متعلق غلط خبریں اور افواہ پھیلانے کے معاملے میں مختلف سوشل پلیٹ فارم بشمول 'نیوز چینل'، تیس سے زائد اکاونٹس کی شناخت کی ہے۔ اس افواہ کی وجہ سے باندرہ ریلوے اسٹیشن پر گزشتہ روز بڑے پیمانے پر لوگ جمع ہو گئے تھے۔

مہاراشٹر سائبر ڈپارٹمنٹ کے آفیشیل بیان کے مطابق ریلوے خدمات سے متعلق غلط خبریں اور افواہ پھیلانے والوں کی شناخت کر کے ممبئی پولیس کو اس کی اطلاع چند گھنٹوں میں ہی دے دی گئی ہے۔'

بیان میں کہا گیا ہے کہ 'ہم نے 30 سے زائد اکاونٹس کی شناخت کی ہے جس میں نیوز چینل سمیت مختلف سوشل پلیٹ فارم شامل ہیں۔ اس کی اطلاع متعلقہ پولیس یونٹ کو دی گئی ہے۔'

ممبئی پولیس نے باندرہ پولیس اسٹیشن کے پاس گزشتہ روز لوگوں کے جمع ہونے پر تین ایف آئی آر درج کی ہے۔

واضح رہے کہ وزیر اعظم نریندر مودی کے ذریعے لاک ڈاون کی مدت میں 3 مئی تک توسیع کرنے کے اعلان کے بعد گزشتہ روز ایک ہزار سے زائد مہاجر مزدوور باندرہ ریلوے اسٹیشن کے پاس جمع ہوئے تھے اور انہوں نے اپنے آبائی گاوں جانے کے لیے ٹرانسپورٹ سہولیات مہیا کرانے کا مطالبہ کیا تھا۔