مرادآباد: قتل کے الزام میں ایک کو جیل

مرادآباد تھانہ مجھولہ علاقہ میں 27 اگست کو ایک ٹرک کے کیبن سے ایک شخص کی لاش برآمد ہوئی تھی۔ پولس نے اس معاملہ میں ایک شخص کو گرفتار کیا ہے۔

ریاست اتر پردیش کے مرادآباد تھانہ مجھولہ علاقے کے ٹرانسپورٹ نگر میں 27 اگست کو پولس کو یہ اطلاع ملی کہ ایک ٹرک کے کیبن میں ایک شخص کی لاش پڑی ہے۔ پولس نے لاش کو قبضہ میں لے کر پوسٹ مارٹم کے لئے بھیج دیا۔ وہیں پولیس نے اس معاملہ میں ایک شخص کو گرفتار کر کے اس سے پوچھ گچھ شروع کردی ہے۔

مذکورہ معاملے کا انکشاف کرتے ہوئے ایس پی سٹی امت آنند نے میڈیا کو بتایا کہ ٹرک کیبن میں ملی لاش کی شناخت یتیندر و رگھو راج، گاؤں برولی، تھانہ انوپ شہر ضلع بلند شہر کے طور پر ہوئی ہے۔

ایس پی سٹی امت آنند نے کہا کہ ہلاک شدہ شخص یتیندر ٹرک ڈرائیور تھا جب کہ ملزم ٹرک ہیلپر ہے۔ دونوں شراب کے نشے میں دھت تھے۔

انہوں نے مزید کہا کہ مقتول یتیندر نے ٹرک ہیلپر وریندر پال کو گالی گلوچ کرنے کے ساتھ اس کی چپل سے پٹائی کی تھی۔ اس کے بعد ہیلپر وریندر نے یتیندر کے سر پر لوہے کی راڈ مارا جس سے موقع پر ہی اس کی موت ہوگئی۔

فی الحال پولس نے لوہے کے راڈ برآمد کر کے ٹرک ہیلپر کو جیل بھیج دیا۔