قنوج کے قاضی شہر اور عالم اسلام کے معروف عالم دین مفتی آفاق احمد مجددی کا کل کانپور کے کارڈیولوجی ہسپتال میں علاج کے دوران انتقال ہوگیا۔
ان کے انتقال کی خبر علاقہ میں پھیلتے ہی ان کے معتقدین کا مولانا مرحوم کے مدرسہ اور خانقاہ میں پہنچنے کا سلسلہ جاری ہے۔انہیں آج ہزاروں سوگواروں کی موجودگی میں نم آنکھوں کے ساتھ سپرد خاک کیا گیا۔
ان کی طبیعت کچھ دنوں سے خراب چل رہی تھی، جس کے تحت انھیں کانپور کے ہسپتال میں داخل کرایا گیا تھا۔
ان کے وصال کی خبر سے پورے قنوج میں غم کی لہر دوڑ گئی۔
سابق وزیر اعلیٰ اکھیلیش یادو بھی کل ان کی میت پر پہنچے۔
اطلاع کے مطابق آج ان کو سپردخاک کرنے کے لیے صرف ملک ہی نہیں بلکہ بیرون ملک سے بھی انکے عقیدت مند قنوج پہنچے ہیں۔
مفتی آفاق احمد ہر برس مارچ میں بین الاقوامی امن کانفرنس کرتے تھے جس میں کئی غیر ملکی عالم بھی شرکت کرتے تھے۔
شہر کے بورڈنگ گراؤنڈ میں ان کی نماز جنازہ ادا کی گئی اور مدرسہ میں واقع خانقاہ میں انھیں سپرد خاک کیا گیا۔
