ریاست اترپردیش میں کورونا وائرس کو قابو میں کرنے کے لیے لاک ڈاون نافذ ہے، جس کی وجہ سے یومیہ مزدور اور غریب افراد کو کافی مشکلات کا سامنا کرنا پڑ رہا ہے۔
ایسے افراد کو کھانا کھلانے کے لیے ضلع مرادآباد کانگریس کمیٹی نے انا پورنا رسوئی کے نام سے ضلع کے مختلف اسپتالوں کے علاوہ دیگر مقامات پر بھی غریبوں کو کھانا تقسیم کر رہی ہے۔
مرادآباد ضلع کانگریس کمیٹی کے صدر ونود گمبر نے بتایا کہ کھانا تقسیم کرنے کا مقصد صرف یہ ہے کہ لاک ڈاون میں پریشان حال اور غریب لوگوں کو دو وقت کا کھانا مہیا کرایا جاسکے۔
ونود گمبر نے مزید کہا کہ جب تک اترپردیش میں لاک ڈاؤن جاری رہے گا تب تک ہم ضرورت مندوں میں کھانا تقسیم کرتے رہیں گے اور آنے والے دنوں میں لوگوں کو کورونا کٹ بھی تقسیم کریں گے جس میں ماسک، سینیٹائزر اور کچھ دوائیاں ہوں گی۔
ضلع کانگریس کمیٹی کے صدر نے حکومت پر ناراضگی کا اظہار کرتے ہوئے کہا کہ موجودہ حکومت میں لوگوں کو زندگی گزارنا بھی مشکل ہو رہا ہے، لوگ بے روزگار ہو چکے ہیں، مہنگائی آسمان کو چھو رہی ہے لیکن حکومت کو عوام کی کوئی پرواہ نہیں ہے۔
انہوں نے حکومت سے مطالبہ کرتے ہوئے کہا کہ کورونا کے دور میں جو لوگ کورونا بیماری کی وجہ سے فوت ہوگئے ہیں۔ ان کے اہل خانہ کو حکومت دس سے بیس لاکھ روپے بطور معاوضہ دے۔
