سماجوادی پارٹی کے قدآور رہنماء اور رامپور کے رکن پارلیمان محمد اعظم خان گذشتہ 22 ماہ سے سیتاپور جیل میں قید ہیں۔ اعظم خاں کے حامیوں کے ذریعہ اپنے اپنے طور پر احتجاج کا سلسلہ ہنوز جاری ہے۔ ایک سماجی تنظیم ویر بھگت سنگھ یوا مورچہ کے کارکنان اعظم خاں کی رہائی کے لئے غیر معینہ مدت تک کے لئے امبیڈکر پارک میں دھرنے پر بیٹھ گئے ہیں۔Indefinite Protest for Azam Khan's Release
اعظم خان کی رہائی کا مطالبہ کرتے ہوئے تنظیم کے ضلع صدر رجت کمار نے ای ٹی وی بھارت سے بات کرتے ہوئے کہا کہ محمد اعظم خاں بے قصور ہیں اور ان کو سیاسی رنجش کے تحت پھنسایا گیا ہے۔
یہ بھی پڑھیں:
انہوں نے کہا کہ موجودہ حکومت کی سرپرستی میں انتہائی سنگین جرائم کے ملزمین آزاد گھوم رہے ہیں جبکہ ایک ایماندار اور خیر خواہ لیڈر کو سلاخوں کے پیچھے ڈال دیا گیا ہے۔ یہ انتہائی شرمناک بات ہے۔ رجت کمار نے مزید کہا کہ محمد اعظم خاں نے سماجی اصلاحات اور تعلیمی میدان میں اہم خدمات انجام دینے کے ساتھ ساتھ اترپردیش بالخصوص رامپور کی تعمیر و ترقی میں اہم کردار ادا کیا ہے۔ ان پر تعصب کی بنیاد پر کارروائی قابل مذمت ہے۔
اس موقع پر دھرنے میں شامل سماجوادی پارٹی کے مقامی رہنماء شانی خان نے کہا کہ جب تک اعظم خان کی رہائی نہ ہو جاتی تب تک یہ احتجاجی مظاہرہ جاری رہے گا۔ انہوں نے کہا کہ سماجوادی حکومت آنے پر اعظم خاں اور پارٹی کے دیگر رہنماؤں سے تمام فرضی مقدمات بھی ہٹائے جائیں گے۔
