ریاست اترپردیش کے شہر مرادآباد میں سماجوادی پارٹی کے سنبھل حلقے سے رکن پارلیمان ڈاکٹر شفیق الرحمٰن برق نے علی گڑھ مسلم یونیورسٹی کی صد سالہ تقریب کے پیش نظر اپنے خیالات کا اظہار کرتے ہوئے کہا کہ 'اگر وزیراعظم چاہیں تو ملک میں نفرت نہیں پھیل سکتی'۔
واضح رہے کہ کل یعنی 22 دسمبر کو وزیراعظم نریندر مودی علی گڑھ مسلم یونیورسٹی (اے ایم یو) کی صد سالہ تقریب سے آن لائن خطاب کریں گے۔
وزیراعظم کے اس پروگرام کی اطلاع ملنے کے بعد علی گڑھ مسلم یونیورسٹی کے طلبا نے اپنے رد عمل کا اظہار کیا ہے۔
ضلع سنبھل سے سماجوادی پارٹی (ایس پی) رکن پارلیمنٹ ڈاکٹر شفیق الرحمٰن برق نے کہا کہ 'علی گڑھ یونیورسٹی کو مصلح قوم سرسید احمد خان نے قائم تھا، سر سید احمد خان کو بھارت رتن دینے کی ہمیشہ آواز اٹھتی رہی ہے لیکن ابھی تک سر احمد خاں کو بھارت رتن دینے کا اعلان نہیں کیا گیا جو بے حد افسوسناک ہے'۔
انہوں نے مزید کہا کہ 'علی گڑھ مسلم یونیورسٹی کے قیام کو سو برس ہوچکے ہیں لیکن ابھی تک یونیورسٹی کو اقلیتی یونیورسٹی کا درجہ نہیں دیا گیا'۔
انہوں نے کہا کہ 'ہم یہ مانگ کرتے ہیں کہ علی گڑھ کے اس صد سالہ جشن کے بعد سرسید احمد خان کو بھارت رتن دیا جائے اور یونیورسٹی کو اقلیتی یونیورسی کا درجہ بھی۔
انہوں نے کہا کہ 'ہماری گذارش ہے کہ اس ادارے کو سیاست کا اڈا نہ بنائیں، کیوں کہ ملک اسی وقت ترقی کرسکتا ہے جب ہر کسی کو برابری کا درجہ دیا جائے'۔
رکن پارلیمنٹ ڈاکٹر شفیق الرحمٰن برق نے کہا کہ 'ملک کو آزاد کرانے میں مسلمانوں نے قربانی دی ہے اس وقت ملک بڑے نازک دور سے گذر رہا ہے لہٰذا اس وقت سب کے اتحاد کی ضرورت ہے'۔
انہوں نے کہا کہ 'وزیراعظم نریندر مودی صد سالہ جشن کے موقع پر محض یونیورسٹی کو فروغ دینے اور اس کی ترقی کے لیے ہی بات کریں، اور یونیوسٹی کے بجٹ کو بڑھائیں اور اسے الاٹ کریں جس سے یونیوسٹی کو ترقی کرنے میں مزید آسانیاں ہوں'۔
