راہل اور پرینکا گاندھی کو میرٹھ جانے سے روک دیا گیا

اترپردیش کے ضلع میرٹھ میں گزشتہ دنوں شہریت ترمیمی قانون کے خلاف پر تشدد احتجاج میں ہلاک ہوئے افراد کے اہلخانہ سے ملاقات کے لیے جارہے کانگریس رہنما راہل گاندھی اور پرینکا گاندھی کو راستے میں ہی روک دیا گیا۔

شہریت ترمیمی قانون کے خلاف بابائے قوم مہاتما گاندھی کی سمادھی راج گھاٹ پر 'ستیہ گرہ' کرنے کے ایک دن بعد آج کانگریس کے سابق صدر راہل گاندھی اور جنرل سکریٹری پرینکا گاندھی واڈرا اترپردیش کے میرٹھ میں مذکورہ قانون کے خلاف احتجاج کے دوران جان گنوانے والے لوگوں کے اہل خانہ سے ملنے جارہے تھے لیکن پولیس نے انہیں شہر میں داخل ہونے سے پہلے ہی روک دیا۔

کانگریس ہیڈکوارٹر سے منگل کو ملنے والی اطلاعات کے مطابق راہل اور ان کی بہن پریانکا ایک ہی گاڑی سے احتجاجی مظاہروں میں تشدد کے دوران مارے گئے لوگوں کے رشتہ داروں سے ملنے میرٹھ جا رہے تھے لیکن پولیس نے انہیں میرٹھ سے چند کلومیٹر پہلے پرتاپور میں ہی روک دیا۔

راہل گاندھی نے بتایا کہ جب انھوں نے پولیس افسران سے پوچھا کہ انہیں کیوں روکا جا رہا ہے، حکام نے اس کا کوئی جواب نہیں دیا اور کہا کہ شہر میں کئی جگہ دفعہ 144 نافذ ہے۔ اس پر گاندھی کا کہنا ہے کہ وہ صرف تین لوگ ہی جا رہے ہیں اس کے باوجود انہیں آگے جانے کی اجازت نہیں دی گئی۔