کورونا وائرس وبا کے پیش نظر ملک میں لاک ڈاؤن کے سبب روزگار سے محروم ہو گئے سماج کے غریب طبقہ کو سرکاری اور سماجی تنظیموں کی مدد کا ہی آسرا ہے۔ ان حالات میں جبکہ سرکاری امداد کا دائرہ محدود ہے، سماجی تنظیموں نے آگے بڑھ کر ذمہ داری قبول کی ہے اور لوگوں کی ضرورتوں کو پورا کرنے کی کوشش کی ہے۔
جمیعت علماء ہند شہر میرٹھ کے صدر قاضی زین الراشدین کے مطابق 'غریب اور ضرورت مند افراد کی مدد ایسے صاحب حیثیت افراد کی امداد سے کی جا رہی ہے، جو ہر سال جمیعت علماء کو چندے کے ذریعہ مالی تعاون کرتے ہیں۔ جمیعت علماء چندے کی اس رقم کا استعمال مختلف فلاحی کاموں کو انجام دینے میں کرتی ہے اور اس سال کورونا وبا کے سبب لاک ڈاؤن کی وجہ سے روزگار سے محروم ہوئے افراد کی مدد کی جا رہی ہے۔ ماہ رمضان اور عید کے پیش نظر راشن اور اشیائے ضروریہ کی تقریباً سو سے زیادہ کٹ تیار کی گئی ہیں اور لوگوں میں تقسیم کی گئی ہیں'۔
جمیعت علماء ہند میرٹھ کے صدر کے مطابق راشن کی اس کٹ کو محض مسلمانوں میں نہیں بلکہ غیر مسلم ضرورت مندوں میں بھی تقسیم کیا کا رہا ہے۔ جمیعت علمائے ہند کی روایت کے مطابق بغیر تفریق مذہب و ملت جمیعت علماء ہر ضرورت مند شخص کے لیے پیش پیش ہے۔
جمیعت علماء ہند میرٹھ شہر کے جنرل سيكريٹری سلمان قاسمی نے بتایا کہ ان حالات میں سماج کے ضرورت مند طبقے تک پہنچ کر مدد کرنے کی کوشش کر رہی ہے۔ میرٹھ میں جمیعت علما ہند کے ذمہ داران اور ممبران نے سماج کے صاحب حیثیت افراد کی مدد سے ضرورت مند لوگوں تک راشن پہنچانے کی کوشش کی ہے۔ جمیعت علماء بغیر تفریق مذہب و ملت خاص طور پر نشاندہی کر کے ایسے ضرورت مند افراد تک راشن پہنچانے کی کوشش کر رہی ہے، جو ضرورت مند تو ہیں، لیکن کسی کے سامنے ہاتھ نہیں پھیلا سکتے۔
