اترپردیش: سڑک حادثے میں 20 مزدور زخمی

ریاست اترپردیش کے ضلع ایودھیا میں سڑک حادثے میں 20 مزدور زخمی ہو گئے ہیں جن میں سے دو کی حالت نازک بنی ہوئی ہے۔

اترپردیش کے ضلع ایودھیا کے شہر کوتوالی علاقے میں پیر کو ایک تیز رفتار ٹرک نے اوور ٹیک کی کوشش میں آگے جا رہی ایک پک اپ گاڑی کو ٹکر مار دی جس کے نتیجے میں 20مزدور زخمی ہوگئے۔

اطلاعات کے مطابق حادثے میں زخمی ہونے والے مزدوروں میں سے دو کی حالت کافی نازک بنی ہوئی ہے۔

پولیس ذرائع نے بتایا کہ ممبئی سے مہاجر مزدور ایک پک اپ میں سوار ہوکر سدھارتھ نگر جا رہے تھے۔ اس درمیان لکھنؤ - گورکھپور نیشنل ہائی وے پر ایودھیا کے شہر کوتوالی علاقے میں نجورا ناکا بائی پاس کے نزدیک ایک تیز رفتار ٹرک نے اوور ٹیک کرنے کی کوشش میں پک اپ کو پیچھے سے ٹکر ماردی۔

اس حادثے میں 20مزدور زخمی ہوگئے جن میں دو کی حالت نازک بنی ہوئی ہے، زخمیوں کو ضلع اسپتال میں داخل کرایا گیا ہے۔

اترپردیش کے وزیر اعلیٰ یوگی آدتیہ ناتھ نے حادثے کا نوٹس لیتے ہوئے ڈسٹرکٹ مجسٹریٹ اور ایس پی کو جائے وقوع پر پہنچ کر حالات کا جائزہ لینے اور زخمیوں کو ہر ممکن مدد فراہم کرنے کے احکامات دئیے ہیں۔