اترپردیش کے کستربا گاندھی کالج میں فرضی ٹیچروں کی تقرری کے معاملے کے بعد محکمہ بیسک ایجوکیشن کی جانب سے بڑی کارروائی کرتے ہوئے سبھی ٹیچروں کے پین کارڈ کی جانچ شروع کر دی گئی ہے۔
فرضی ٹیچروں کی تقرری کی جانچ ایس ٹی ایف کر رہی ہے جس میں ابھی تک 3افراد گرفتار کئے جا چکے ہیں۔ بیسک ایجوکیشن نے 2013 کے بعد تقرری پانے والے ایسے ٹیچروں کی فہرست تیار کرنے کا حکم دیا ہے جنہوں نے اپنا پین کارڈ اس دوران تبدیل کیا ہے۔ ان پین کارڈوں کو ٹیچروں کے سروس بک اور بیسک سرٹیفکیٹ سے ملایا جائے گا۔
بیسک ایجوکیشن افسر دنیش کمار نے اکاؤنٹنٹ کو حکم دیا ہے کہ 2013 کے بعد تقرری پانے والے ان ٹیچروں کی فہرست تیاری کی جائے جنہوں نے اپنے پین کارڈ تبدیل کئے ہیں۔ ایسے ٹیچروں کی فہرست کو بلاک ایجوکیشن افسر کے آفس میں موجود انکے بنیادی دستاویزات اور دیگر سرٹیفکیٹ سے موازنہ کیا جائےگا۔
محکمہ کے مطابق پین کارڈ میں تبدیلی سے فرضی تقرریوں کا پردہ فاش ہوگا۔ محکمہ بیسک ایجوکیشن نے اکاونٹنٹ کو آج ہی کام پورا کرنے کا حکم دیا ہے۔
دریں اثناء محکمہ بیسک ایجوکیشن میں ہوئی اس گڑبڑی سے وزیر اعلیٰ یوگی آدتیہ ناتھ کافی ناراض تھے اور انہوں نے پورے معاملے کی جانچ کا حکم دیا تھا۔
