یوپی مدرسہ تعلیمی بورڈ کے نتیجے کا اعلان اگلے ہفتے

رواں برس کورونا وائرس کی وجہ سے مدرسہ بورڈ سمیت متعدد تعلیمی بورڈز نے امتحان منعقد نہیں کیا تھا، لیکن سبھی تعلیمی بورڈز نے اگست ماہ میں ہی نتائج کا اعلان کردیا تھا، لیکن مدرسہ بورڈ اب خواب سے بیدار ہوا ہے۔

اتر پردیش مدرسہ تعلیمی بورڈ لکھنؤ کے رجسٹرار آر پی سنگھ نے ای ٹی وی بھارت سے بات کرتے ہوئے کہا کہ بورڈ سیکنڈری اور سینئر سیکنڈری کے نتائج کا اعلان اگلے ہفتے کرے گا۔ اس حوالے سے سبھی تیاریاں مکمل کرلی گئی ہیں۔ افسران کو کاغذات کی کارروائی کرنے کے لئے بھی کاغذات بھیجے جاچکے ہیں۔

واضح رہے کہ رواں برس کورونا وائرس کی وجہ سے مدرسہ بورڈ سمیت متعدد تعلیمی بورڈز نے امتحان منعقد نہیں کیا تھا، لیکن سبھی تعلیمی بورڈز نے اگست ماہ میں ہی نتائج کا اعلان کردیا تھا، جس سے طلباء و طالبات کو سہولت ہوئی، تاہم مدرسہ بورڈ نے اپنے نتائج کے اعلان میں سستی و تساہلی سے کام لیا، جس کی وجہ سے نہ صرف طلباء و طالبات کو مشکلات کا سامنا کرنا پڑا بلکہ مدارس کے لوگ بھی تشویش میں مبتلا رہے۔

بیشتر طلبا و طالبات یونیورسٹیز میں داخلے کے خواہش مند ہوتے ہیں لیکن رزلٹ میں تاخیر ہونے سے دشواریوں سے دوچار رہے۔

ای ٹی وی بھارت سے بات کرتے ہوئے مدرسہ بورڈ کے رجسٹرار نے بتایا کہ رواں برس رزلٹ کے اعلان میں تاخیر ہوئی ہے اس کی متعدد وجوہات تھیں، اول وجہ یہ کہ نمبر دینے کے فارمولے کے تعین کرنے میں ہی وقت لگ گیا۔ اس کے بعد طلبا و طالبات کے گزشتہ ریکارڈ دیکھنے میں بھی وقت لگا۔

انہوں نے کہا کہ ایسے میں تاخیر ہوتی گئی لیکن اب آئندہ ہفتے نتائج کا اعلان کردیا جائے گا، جس کے متعلق تمام تر تیاریاں مکمل کرلی گئی ہیں اور کاغذی کارروائی بھی پوری کرلی گئی ہے۔