ریاست اتر پردیش کی رامپور جیل میں مقید اجتماعی قتل کی قصوروار شبنم کا آٹھ سالہ بیٹا تاج ان سے ملنے رامپور پہنچا۔ ، شبنم کو پھانسی کی سزا سنائی گئی ہے۔ اس دوران اس کے ساتھ آئے اس کے سرپرست نے میڈیا سے مخاطب ہوکر تاج کی رحم کی اپیل کو دہرایا اور تاج کے بہتر مستقبل کے لئے اس کو رسوائی سے بچانے کی اپیل کی۔
خاتون قیدی شبنم جس کو عدالت نے پھانسی کی سزا سنائی ہے، کی سزا کو صدر جمہوریہ نے بھی برقرار رکھتے ہوئے اپنے دستخط کر دیے ہیں۔
عدالتی جانچ میں ثابت ہوا ہے کہ اس نے سلیم سے عشق کی خاطر اپنے ہی کنبہ کے سات افراد کو ہمیشہ کے لئے موت کی نیند سلا کر ایک بڑے جرم کا ارتکاب کیا تھا۔ یہی وجہ ہے کہ مقامی عدالت سے لے کر عدالت عالیہ اور عدالت عظمیٰ تک نے شبنم کو پھانسی کی ہی سزا سنائی تھی۔ جس کو برقرار رکھتے ہوئے صدر جمہوریہ نے بھی اپنے دستخط کر دیے ہیں۔
اب جیل انتظامیہ کو ڈیتھ وارنٹ کا انتظار ہے۔ اگر ڈیتھ وارنٹ آ جاتا ہے تو شبنم کو متھرا کی جیل میں پھانسی دی جائے گی، کیونکہ خواتین قصورواروں کو پھانسی دینے کا نظم متھرا جیل میں ہے۔ اگر شبنم کو پھانسی دی جاتی ہے تو وہ آزاد بھارت کی پہلی خاتون قصوروار ہوگی جس کو پھانسی کے تختہ پر چڑھایا جائے گا۔
وہیں شبنم کا آٹھ سالہ بیٹا تاج اپنی ماں کے لئے صدر جمہوریہ اور وزیراعظم سے رحم کی درخواستیں کر رہا ہے۔ تاج اپنے سرپرستوں کے ہمراہ آج رامپور پہنچا جہاں اس نے رامپور جیل پہنچ کر بہت دیر تک اپنی ماں شبنم سے ملاقات کی۔
یہ بھی پڑھیں: متھرا جیل میں شبنم کو پھانسی دینے کی تیاری شروع
اس کے بعد جب میڈیا کے نمائندوں نے اس سے بات کرنا چاہا تو اس نے کیمروں کے سامنے آنے سے انکار کر دیا۔ اس درمیان اس کے ساتھ آئی اس کے سرپرست نے میڈیا سے مخاطب ہو کر کہا کہ 'شبنم نے جو گناہ کیا تھا اس کی سزا اس کے معصوم بیٹے کو نہیں دی جائے'۔
واضح رہے کہ امروہہ ضلع کے باونکھیڑی گاؤں کی رہائشی شبنم کا آرا مشین چلانے والے سلیم کے ساتھ کئی سالوں سے عشق چل رہا تھا۔ 14 اپریل کی رات شبنم نے اپنے عاشق سلیم کے ساتھ مل کر اپنے گھر کے سات افراد کو بے رحمی سے قتل دیا تھا۔ اس قتل عام میں اس کے والد شوکت، والدہ ہاشمی، بھائی انیش، بہو انجم، پوتہ عرش، بھائی رشید، بھانجہ راویہ کو زہر دینے کے بعد کلہاڑی سے قتل کردیا گیا تھا۔
