ریاست اترپردیش کے ضلع بھدوہی کے مقامی کوتوالی علاقے کے قاضی پور محلہ میں واقع مرکزی مسجد کے گیسٹ ہاؤس میں لاک ڈاون کے دوران پھنسے ہوئے گیارہ بنگلہ دیشی افراد کے خلاف مقدمہ درج کیا گیا تھا، جن میں سے 7 اراکین کو گزشتہ رات الہ آباد ہائی کورٹ کی ہدایت کے بعد ڈسٹرکٹ جیل بھدوہی سے رہا کیا گیا۔
واضح رہے کہ یہ تمام بنگلہ دیشی، دہلی میں منعقدہ مرکز کے پروگرام میں شرکت کے لئے آئے تھے، جس کے بعد وہ دہلی سے بھدوہی آئے تھے۔
جس کے بعد پولیس کو ان کے مسجد میں قیام کی اطلاع موصول ہوئی اور پولیس نے انہیں گرفتار کرلیا جن پر وبائی ایکٹ اور سفری ویزا پر مذہب کی تبلیغ کرنے پر ایف آئی آر درج کی گئی تھی۔
پولیس کے مطابق 11 بنگلہ دیشی جو نظام الدین تبلیغی جماعت میں شرکت کے لئے آئے تھے ان کے پاس سیاحتی ویزا تھا لیکن وہ یہاں مذہبی تبلیغ کے پروگرام میں شامل تھے۔ لہذا اس کے خلاف مقدمہ درج کیا گیا ہے۔
