ریاست اترپردیش کے ضلع رامپور میں بیوپاری سماج نے انتظامیہ اور میونسپلٹی کے افسران کی جانب سے بیوپاریوں کے استحصال سے تنگ آکر صدر جمہوریہ سے 'مرضی کی موت' کا مطالبہ کیا۔ اس دوران بیوپاریوں نے انتظامی افسران کی جانب سے کئے گئے چالان اور استحصال کا بھی ذکر کیا۔
تفصیل کے مطابق رامپور کی پرانی تحصیل کے احاطے میں جمع ہوکر آج بیوپاریوں نے انتظامیہ اور میونسپلٹی افسران کے خلاف احتجاج کرتے ہوئے صدر جمہوریہ سے مرضی کی موت کی اپیل کی۔
دراصل بیوپاریوں کا کہنا ہے کہ' گذشتہ کئی روز سے انتظامیہ اور میونسپلٹی افسران اپنی من مانی کی وجہ سے بیوپار نہیں کرنے دے رہے ہیں'۔
انہوں نے کہا کہ' افسران آئے دن پولیس جوانوں کو لے کر مارکیٹ پہنچ جاتے ہیں اور بے وجہ چالان کاٹتے ہیں، ساتھ ہی دکانداروں کے ساتھ بدزبانی اور بدسلوکی بھی کرتے ہیں۔
اترپردیش ادھیوگ بیوپار منڈل کے ضلع صدر شیلیندر شرما نے ای ٹی وی بھارت کو بتایا کہ' انتظامیہ کی جانب سے ان بیوپاریوں کا بے جا استحصال کیا جا رہا ہے۔ وہ ہمارے صبر کا امتحان نہ لیں'۔
مزید پڑھیں:
آدھار کارڈ کے اندراج میں تبدیلی، ایک بڑا چیلنج
انہوں نے کہا کہ' ہمارے بیوپاریوں کا اتنا استحصال کیا جا رہا ہے کہ بیوپاری اپنی رسوائی سے تنگ آکر خودکشی کرنے کی کوشش بھی کر چکے ہیں۔ جن کو بڑی مشکل سے ایسا کام کرنے سے بچایا جا رہا ہے'۔ اب دیکھنا یہ ہوگا کہ انتظامیہ ان بیوپاریوں کے مطالبات کو کتنی سنجیدگی سے قبول کرتا ہے۔
