رامپور میں سڑک کا کام نامکمل ہونے سے راہگیر اور مقامی لوگ پریشان

اترپردیش کے رامپور کے وارڈ چھ میں سڑک کی نامکمل تعمیر ہونے سے مقامی و راہگیروں کو پریشانیوں کا سامنا کرنا پڑرہا ہے۔ اسے لے کر انتظامیہ سے کئی بات شکایت کی گئی لیکن کوئی توجہ نہیں دی گئی۔

ریاست اترپردیش کے شہر رامپور کے وارڈ نمبر چھ ( 6 )کی گلی پیر زادگان میں تقریباً 25 روز سے سڑک کی تعمیر کا کام نامکمل ہونے کی وجہ سے راہگیروں اور مقامی لوگوں کو کافی دشواریوں کا سامنا کرنا پڑرہا ہے۔ مقامی لوگوں نے میونسپلٹی اور افسران کے خلاف احتجاجی مظاہرہ کرتے ہوئے سڑک کی از سر نو تعمیر کا مطالبہ کیا۔

رامپور میں حکومت کی جانب سے کرائے جانے والے تعمیراتی کام برائے نام ہی نظر آرہے ہیں۔ اس کے ساتھ ہی کہیں کہیں تو سڑکوں اور گلیوں کی تعمیر نو کے نام پر کھود دیا جاتا ہے لیکن کئی کئی ہفتوں کام کو بند کرکے جہاں سرکاری خزانے کا بیجا استعمال کیا جاتا ہے وہیں راہگیروں اور مقامی لوگوں کے لئے بھی ایک بڑی دشواری کھڑی کردی جاتی ہے۔

کچھ ایسا ہی معاملہ آج کل رامپور کے پیلا تالاب واقع گلی پیر زادگان میں دیکھنے میں آرہا ہے۔ میونسپلٹی کے وارڈ چھ کے تحت آنے والی اس گلی کی سڑک گزشتہ تقریباً 25 روز سے کھدی ہوئی ہے۔ بتایا گیا تھا کہ یہاں نئی ٹائیلس بچھائی جائیں گی۔

مقامی لوگوں کا کہنا ہے کہ نئی ٹائیلس تو نہیں بچھیں بلکہ عوام کے لیے یہ سڑک پریشانیوں کا سبب بن گئی ہے۔ ٹوٹا پھوٹا روڈ ہونے کی وجہ سے آئے دن حادثے ہوتے رہتے ہیں۔ کئی لوگوں کو اب تک چوٹیں لگ چکی ہیں۔
25 روز گزر جانے کے باوجود بھی جب ابھی تک کام نہیں ہوا تو مقامی لوگوں کا آج غصہ پھوٹا اور انہوں نے گلی پیرزادگان میں جمع ہوکر میونسپلٹی اور ضلع کے افسران کے خلاف زبردست نعرے بازی کی۔

احتجاج کے دوران ای ٹی وی بھارت سے بات کرتے ہوئے مقامی لوگوں نے کہا کہ وہ کئی مرتبہ اس سڑک کی تعمیر مکمل کرانے کے لئے متعلقہ محکمہ کو درخواستیں دے چکے ہیں۔ ساتھ ہی وزیر اعلیٰ کے شکایتی پورٹل پر بھی اپنی شکایت کا اندراج کراچکے ہیں لیکن کہیں سے ان کو کوئی خاطر خواہ جواب نہیں ملا۔ اس کے علاوہ انتظامیہ کے پاس جب وہ شکایت لیکر جاتے ہیں تو وہاں صرف یقین دہانی کرادی جاتی ہے لیکن سڑک کا کام کسی طرح مکمل نہیں ہورہا ہے۔