تمام تر کوششوں کے باوجود ایکسپریس وے پر حادثات اور اموات روکنے کا نام نہیں لے رہے ہیں۔ حادثات کو روکنے کے لئے نئی کوششیں کی جا رہی ہیں۔ اب کار والوں کو کم سے کم 99 منٹ (1 گھنٹہ 39 منٹ) میں یمنا ایکسپریس وے کو عبور کرنا پڑے گا۔ اگر آپ اس سے کم وقت میں یمنا ایکسپریس وے کا سفر مکمل کرتے ہیں تو بھاری جرمانہ عائد کیا جائے گا۔
موصولہ اطلاع کے مطابق یمنا ایکسپریس وے پر ایک ٹائم بوتھ لگایا جائے گا۔ یہ گاڑیوں کی رفتار پر نظر رکھے گا۔ اگر کوئی گاڑی ایکسپریس وے کا سفر مقررہ وقت سے کم وقت میں مکمل کر لیتی ہے تو اس کا چالان کاٹا جائے گا۔ اس وقت ایکسپریس وے پر نصب کیمروں کے ذریعے گاڑیوں کی رفتار چیک کر کے چالان کیا جاتا ہے۔
یہ بھی پڑھیں: یمنا ایکسپریس وے پربھیانک حادثہ، درجنوں ہلاک
یمنا اتھارٹی اب گریٹر نوئیڈا اور آگرہ زیرو پوائنٹ پر ایکسپریس وے کے دونوں طرف ٹائم بوتھ قائم کرے گی۔ ایک بار ٹائم بوتھ انسٹال ہو جانے کے بعد یہ معلوم ہو جائے گا کہ کون سی گاڑی ایکسپریس وے میں داخل ہوئی ہے اور اس نے دوسرے اینڈ کا کتنے وقت میں سفر مکمل کیا ہے۔ اگر طے شدہ وقت سے پہلے سفر مکمل ہو جائے تو چالان کاٹا جائے گا۔
یمنا ایکسپریس وے پر ہلکی گاڑیاں عام دنوں میں 100 کلومیٹر فی گھنٹہ کی رفتار سے سفر کر سکتی ہیں۔ بھاری گاڑیوں کی زیادہ سے زیادہ رفتار 80 کلو میٹر فی گھنٹہ ہونی چاہئے۔ اب نئے سسٹم کے تحت کاروں جیسی ہلکی گاڑیوں کو کم از کم 99 منٹ میں 165 کلومیٹر کا یہ سفر طے کرنا ہوگا۔ بھاری گاڑیاں 124 منٹ (دو گھنٹے چار منٹ) میں مکمل کریں گی۔
