'آخر کہاں جائیں ہم؟'

ریاست اتر پردیش کے دارالحکومت لکھنؤ میں واقع صدر بازار کے قریب ایک قدیم بستی ہے۔ یہاں طویل عرصے سے غریب لوگ رہ رہے ہیں۔ یہ غریب لوگ اس بات سے ڈرے ہوئے ہیں کہ انہیں بنگلہ دیشی کہ کر یہاں سے ہٹا دیا جائے گا۔

ای ٹی وی بھارت کے نمائندے اس بستی میں پہنچے اور لوگوں سے بات کی۔ ان غریبوں کا کہنا ہےکہ وہ بنگہ دیشی نہیں بلکہ بھارتی ہیں۔ ان لوگوں نے یہ بھی بتایا کہ ملک میں جب سے این آر سی کی شروعات ہوئی ہے تب سے یہاں رہ رہے غریبوں میں ایک خوف پیدا ہو گیا ہے۔ انہیں لگتا ہے کہ کبھی بھی ان کو بنگلہ دیشی بتا کر انہیں یہاں سے ہٹایا جا سکتا ہے یا ان کے آشیانے کو ان کے سر سے چھنینا جا سکتا ہے۔

اس بستی سے تعلق رکھنے والی فاطمہ بیگم نے بتایا کہ 'یہاں غریب بستی ہے جنہیں بنگلہ دیشی کہا جا رہا ہے جبکہ یہ بات بالکل بے بنیاد ہے۔ اگر حکومت کو لگتا ہے کہ ہم غلط ہیں تو اس کی تحقیقات کروا لے تاکہ دودھ کا دودھ اور پانی کا پانی ہو جائے'۔

انہوں نے مزید بتایا کہ 'اس آبادی کو بسانے میں بخشی دیدی اور بنارسی داس جو کہ یوپی حکومت میں وزیر رہ چکے ہیں، ان کا ہاتھا ہے۔'

مقامی باشندے امتیاز احمد نے بات چیت کے دوران کہا کہ 'ہم لوگ کوڑا کرکٹ کا کام کرکے خاندان کا پیٹ پال رہے ہیں۔ یہاں پر نا تو تعلیم کا کوئی بندوبست ہے اور نہ ہی ہمارے صحت کے لیے کوئی ہسپتال موجود ہے'۔

انہوں نے کہا کہ 'ہمیں بنگلہ دیشی کہہ کر یہاں سے نکالنے کی شازس ہو رہی ہے۔ انہوں نے کہا کہ 'امر اجالا اخبار نے گذشتہ روز یہ خبر شائع کی تھی کہ یہاں پر بنگلہ دیشی رہتے ہیں اور وہ لوگ دہشت گردی میں بھی شامل ہو سکتے ہیں'۔

امتیاض کے مطابق اخبار نے مذید لکھا کہ 'اس آبادی کے قریب ہی گورنر ہاوس، اسمبلی ہاؤس ساتھ ہی دیگر سرکاری عمارتیں موجود ہیں۔ لہذا یہاں کے رہنے والے لوگوں سے مزید خطرہ در پیش آ سکتا ہے'۔

شانتی دیوی جن کی عمر تقریبا سو برس ہونے کو ہے انہوں نے بتایا کہ 'ہماری پیدائش اسی بستی کی ہے۔ اب ہمیں بنگلہ دیشی کہا جا رہا ہے'۔ انہوں نے کہا کہ 'آخر ہم کہاں جا کر مر جائیں؟؟؟'

انہوں نے بتایا کہ 'ہمارا پریوار کباڑ کا کام کر کے زندگی بسر کر رہا ہے اور اب ہمیں یہاں سے ہٹانے کی بات چل رہی ہے'۔ شانتی دیوی نے کہا کہ 'امر اجالا اخبار نے ہم پر جو الزام لگایا ہے جو کہ غلط ہے'۔

انہوں نے کہا کہ 'اگر حکومت ہمیں ہٹانا ہی چاہتی ہے تو بہتر یہی ہے وہ ہمیں گولی مار دے تاکہ ان کی اور ہماری پریشانی دور ہو جائے'۔

بستی کی ضعیفہ مئناوتی نے کہا کہ 'اس پورے علاقے میں پہلے جنگلات تھے۔ ہم لوگ قدیم عرصے سے یہاں پر قیام پذیر ہے اور ہمیں حکومت اب ہٹانا چاہتی ہے جو کہ غلط ہے'۔

اس بستی کے آس پاس رہنے والوں کے مطابق اس بستی کو 2006 میں ایل آئی یو کے ذریعے تحقیقات کروائی گئی تھی جس کے بعد یہاں پر ایسا کوئی کام نہیں پایا گیا جو خطرناک ہو۔

علاقے کے پارسد نیرج یادو نے ای ٹی وی بھارت سے فون پر بات چیت کے دوران کہا کہ یہاں پر سبھی کے پاس ووٹر آئی ڈی، آدھار کارڈ اور کاغذات موجود ہیں۔ سبھی کے پاس بجلی اور پانی کنکشن بھی ہے۔ لہذا یہاں پر کوئی بنگلہ دیشی موجود نہیں ہے۔ پھر بھی حکومت کو لگتا ہے تو وہ اس کی دوبارہ تحقیقات کروا لے۔