ذرائع نے جمعہ کی رات بتایا کہ تین رکنی ایس آئی ٹی نے آج وزیراعلیٰ کو اپنی پہلی رپورٹ پیش کی جس میں بادیٔ النظر واقعہ کے بعد جانچ میں پولیس کی لاپروائی سامنے آئی ہے جس پر فوری طور پر فیصلہ کرتے ہوئے حکومت نے پانچ پولیس اہلکاروں کو معطل کر دیا ہے۔
وزیر اعلیٰ یوگی آدتیہ ناتھ نے ابتدائی تفتیشی رپورٹ کی بنیاد پر متعدد پولیس اہلکاروں کے خلاف سخت کارروائی کرتے ہوئے موجودہ ایس پی وکرانت ویر، ڈی ایس پی رام شبد، انسپکٹر دنیش کمار ورما سمیت دیگر اہلکاروں کو معطل کردیا ہے۔
وزیر اعلی نے تمام افسروں اور اہلکاروں کا پولی گرافی و نارکو ٹیسٹ بھی کروانے کا حکم جاری کیا ہے۔ اس کے ساتھ ہی ہلاک شدہ لڑکی کے اہل خانہ کا بھی نارکو ٹیسٹ کرانے کا حکم جاری کرنے کی بھی خبر ہے۔
وزیراعلی یوگی آدتیہ ناتھ نے ٹویٹ کر کے یقین دلایا کہ ریاست میں ماؤں بہنوں کے احترام و عزت کو نقصان پہنچانے والوں کا مکمل خاتمہ یقینی ہے۔ انہیں ایسی سزا ملے گی جو مستقبل میں مثال پیش کرے۔
واضح رہے کہ ہاتھرس میں حیوانیت کی شکار ایک 19 سالہ لڑکی کی گزشتہ منگل کو دہلی کے ایک اسپتال میں موت ہوگئی تھی۔ اس معاملہ میں پولیس نے چار نوجوانوں کو گرفتار کیا ہے۔
