وسیم رضوی کو جان سے مارنے کی دھمکی

اپنے بیانوں کی وجہ سے اکثر سرخیوں میں رہنے والے شیعہ وقف بورڈ کے سابق چیئرمین وسیم رضوی کو راجستھان سے فون پر جان سے مار دینے کی دھمکی ملی۔

یو پی شیعہ وقف بورڈ کے سابق چیئرمین وسیم رضوی نے بیان جاری کرتے ہوئے بتایا کہ انہیں جان سے مارنے کی دھمکی دی گئی ہے۔ انہوں نے کہا کہ پوری دنیا میں دہشتگرد ذہنیت رکھنے والے مسلمانوں کی سوچ ایک جیسی ہے۔ چاہے وہ فرانس کا ہو یا ہندوستان کا۔

وسیم رضوی نے کہا کہ 'فرانسیسی پروفیسر کی گردن صرف اس لیے کاٹ دی گئی کیونکہ اس نے پیغمبر اسلام کا کارٹون بنایا تھا، جو ایک طالب علم کو پسند نہیں آیا۔ ہم بھارت میں مسلمانوں کو صحیح راہ دکھانے کی بات کرتے ہیں، اسلام میں کٹر پن کی مخالفت کرتے ہیں لیکن یہ باتیں ہندوستانی مسلمانوں کو پسند نہیں آتیں۔ اس لیے میری گردن کاٹنے کے لئے فون پر دھمکی اور فتوی جاری کرتے ہیں۔'

انہوں نے کہا کہ 'یہ دھمکیاں، فتوی اور انعامات مسلمانوں کی ذہنیت کو بتاتا ہے کہ وہ غلط اسلام کو فالو کر رہے ہیں۔ اسلام میں اس طرح کی ظالمانہ باتوں کی کوئی گنجائش نہیں ہے۔'

آج وسیم رضوی کو فون پر جان سے مارنے کی دھمکی بھی دی گئیں حالانکہ ابھی تک انہوں نے اس کی شکایت پولیس میں نہیں کی۔ وسیم رضوی شیعہ وقف بورڈ کے چیئرمین کی کرسی دوبارہ حاصل کرنے کی کوشش میں تھے لیکن کامیابی نہیں ملی کیونکہ معروف شیعہ عالم دین مولانا کلب جواد نے وسیم رضوی کی سخت مخالفت کی تھی۔

واضح رہے کہ وسیم رضوی اکثر ایسے بیانات دیتے ہیں، جس کا مسلم سماج مخالفت کرتا ہے۔