رامپور: ٹرانسپورٹ ایجنسی میں آتشزدگی

ریاست اترپردیش کے شہر رامپور میں ایک ٹرانسپورٹ ایجنسی میں آتشزدگی کا حادثہ پیش آیا ہے۔ آتشزدگی میں کروڑوں کا مال جل کر خاکستر ہو گیا۔ حادثہ رات تقریباً ایک بجے پیش آیا۔ حادثہ کے وقت ایجنسی کے دو ملازم یہیں سو رہے تھے جو بال بال بچ گئے۔

جب پورا شہر دیوالی کا تہوار منانے میں مصروف تھا اور لوگ اپنے گھروں میں آتشبازی کر رہے تھے، روشنیوں کے چراغ سے پورا شہر نہایا ہوا تھا، تبھی رامپور کے سول لائنس علاقے میں گرجیت سنگ آہوجا کی رامپور گڈز ایجنسی ٹرانسپورٹ پر تقریبا ایک بجے بھیانک آتشزدگی کا حادثہ پیش آیا۔

اس کی اطلاع وہاں سو رہے اس ٹرانسپورٹ کے دو ملازمین نے ٹرانسپورٹ مالک گرجیت سنگ کو ان کے گھر پر جاکر دی۔ کچھ دیر بعد فائر بریگیڈ نے پہنچ کر آگ پر قابو پایا۔
اچانک پیش آئے آتشزدگی کے واقعہ پر گرجیت سنگھ کا کہنا ہے کہ ابھی یقینی طور پر کچھ بھی نہیں کہا جا سکتا کہ یہ آتشزدگی کیسے پیش آئی، حالانکہ انہوں نے یہ بھی کہا کہ دیوالی کی آتشبازی کے دوران چھوڑے جانے والے پٹاخوں سے یہ آگ لگی ہے۔

مقامی لوگوں کے مطابق یہ ٹرانسپورٹ ایجنسی رامپور ضلع کی بڑی ٹرانسپورٹ ایجنسی میں سے ایک ہے۔ ان کا کہنا ہے یہاں سے رامپور کے تاجروں کا مال ملک و بیرون ملک سے اسی ٹرانسپورٹ ایجنسی کے ذریعہ آتا ہے۔