پہلے دن بڑی تعداد میں امیدوار پرچہ نامزدگی داخل کرنے کے لیے کلکٹریٹ پہنچے۔
کلکٹریٹ احاطے میں امیدواروں کی بھیڑ نظر آئی، جہاں امیدواروں نے سماجی دوری پر عمل نہیں کیا۔امیدوار ایک دوسرے سے بلکل قریب نظر آئے۔
بارہ بنکی ضلع پنچایت کے 57 حلقوں کے انتخابات کی پرچہ نامزدگی کلکٹریٹ میں ہورہی ہے۔ اس لیے یہاں ضلع بھر سے امیدوار پرچہ نامزدگی کے لیے آرہے ہیں۔
تمام امیدواروں کا پرچہ نامزدگی کا عمل ایک ہی عمارت کے چار کمروں جاری ہے۔جبکہ کمروں کے باہر برآمدے میں امیدوار سماجی فاصلے کے عمل کو تار تار کرتے نظر آرہے ہیں۔ مرد عورت سب ایک ساتھ لائن میں کھڑے نظر آرہے ہیں ۔
دوپہر میں پولیس سپریٹینڈنٹ یمونا پرساد نے پرچہ نامزدگی کی جگہ کا معائنہ کیا اس دوران وہ بھیڑ دیکھ کر کافی غصہ ہوئے۔ انہوں نے خود بھیڑ کو دور کرایا۔ لیکن تھوڑی دیر بعد پھر وہی ماحول ہوگیا۔
واضح رہے کہ کووڈ-19 کی دوسری لہر ملک بھر میں قہر برپا کررہی ہے، ایسے میں عوام سے اپیل اور توقع کی جارہی ہے کہ وہ ماسک اور سینیٹائیزر کے ساتھ ہی سماجی فاصلے کی ہدایت پر بھی عمل کریں، لیکن انتخابی عمل میں یہ تمام چیزیں کہیں بھی نظر نہیں آ رہی ہے۔
