ریاست اترپردیش کے شہر بارہ بنکی میں مجوزہ جنتا کرفیو اور جمعہ کو لکھنؤ میں متاثرہ مشتبہ مریض کی تعداد میں اضافے کے بعد انتظامیہ کمر بستہ ہو گیا ہے۔
ضلع کو کووڈ-19 سے پاک رکھنے کے لیے متعدد فیصلے کیے ہیں اور احتیاطی اقدام میں اضافہ کر دیا ہے، تاہم پولیس بھی اس سمت مستعد نظرآرہی ہے۔
ہفتے کو پولیس کے جوانوں نے تمام تھانوں میں سڑکوں پر اتر کر عوام کو کرونا وائرس سے تحفظ کے پرچے تقسیم کیے، اس دوران پولیس اہلکاروں نے عوام سے اپیل کی کہ وہ اتوار کو گھروں سے نہ نکلیں۔
پولیس اہلکاروں نے عوام کو کووڈ-19 کے خطرے بتائے، اور ساتھ ہی انہوں نے اعلان کیا کہ اتوار کو تمام دکانیں، ہوٹلز اور لاج بند رہیں گے۔
انہوں نے کہا کہ شہر میں صرف دوا دکانوں کو ہی کھولنے کی اجازت دی گئی ہے، پولیس نے دکانداروں کو بھی انتباہ کیا ہے کہ وہ اتوار کو اگر دکان کھولتے ہیں، تو سخت کاروائی کی جائے گی۔
وہیں دوسری جانب شہر کو لکھنؤ کی سرحد سے منسلک ہونے کی وجہ سے بارہ بنکی کی تین تحصیلوں میں زیادہ احتیاط برتا جارہا ہے۔
