اکتوبر 21 کو رامپور میں شہر اسمبلی سیٹ پر ضمنی انتخاب ہونا ہے۔ سماج وادی پارٹی کے سینیئر رہنماء اعظم خاں کے رکن پارلیمان بن جانے کے بعد یہ نشست خالی ہو گئی تھی۔
رامپور میں آج ضمنی انتخاب کے لئے تشہیر کا آخری دن تھا۔ تمام ہی امیدواروں نے آخری دن اپنی پوری طاقت جھونک کر رائے دہندگان کو اپنی جانب راغب کرنے میں کوئی کسر نہیں چھوڑی۔
سخت مقابلہ یہاں حکمراں جماعت بی جے پی اور سماجوادی پارٹی کے درمیان نظر آیا۔ بی جے نے اپنے امیدوار کی حمایت میں جہاں بائک ریلی کا اہتمام کیا تو وہیں سماجوادی پارٹی نے رکن پارلیمان اعظم خاں کی بیگم ڈاکٹر تزئین فاطمہ کے حق میں قلعہ کے میدان میں بڑے جلسہ عام کا اہتمام کیا۔ جس کو خصوصی طور پر سابق وزیر اعلی و سماجوادی سربراہ اکھلیش یادو نے خطاب کیا۔
اس موقع پر انہوں نے عوام سے تزئین فاطمہ کے حق میں ووٹ کرنے کی اپیل کی۔ انہوں نے اعظم خاں پر دائر مقدموں پر بولتے ہوئے کہا کہ اعظم خاں پر تو ابھی اتنے مقدمے نہیں ہوئے ہیں جتنے ہمارے نیتاجی ملائم سنگھ یادو پر ہوئے تھے اور وہ ایک ہی رات میں ختم ہو گئے تھے۔
اس تشہری جلسہ سے رکن پارلیمان اعظم خاں، ممبر اسمبلی عبداللہ اعظم اور ضمنی انتخاب کی امیدوار تزئین فاطمہ نے بھی خطاب کیا۔
