کپوارہ: ہیلتھ سب سینٹر مانکل ماور میں پچھلے سات ماہ سے ملازمین غیر حاضر

جموں وکشمیر کے ضلع کپوارہ کے علاقہ مانیکل میں سب ہیلتھ سینٹر مانکل ماور میں پچھلے سات ماہ سے ملازمین اپنی ڈیوٹی پر نہیں آرہے ہیں۔ یہاں کے مقامی لوگوں کا کہنا ہے کہ صرف ایک شخص اس سب سینٹر پر ہوتا ہے جو وقتاً فوقتاً یہاں ڈریسنگ اور انجیکشن دیتا ہے۔

مقامی لوگوں کا کہنا ہے کہ تین ملازموں کی تنخواہ سب سینٹر پوسٹ سے جاری ہوتی ہے۔ لیکن وہ ڈیوٹی پر نہیں آتے ہیں۔ اگر ان سے رابطہ کرنے کی کوشش کی جائے تو کئی وجوہات بتاکر فون رکھ دیتے ہیں اور ان کی جانب کوئی توجہ نہیں دی جاتی۔

لوگوں کا کہنا ہے کہ یہ ایک پسماندہ علاقہ ہے۔ یہاں گاڑی ملنا مشکل ہوتا ہے اور یہاں سے اسپتال 25 کیلو میٹر دور ہے۔ اگر کسی کو معمولی چوٹ یا تیز بخار ہو تو اس کو 25 کلو میٹر کا سفر طے کرکے اسپتال پہنچانا پڑتا ہے۔ اس سے ان لوگوں کو بہت زیادہ مشکلات کا سامنا کرنا پڑتا ہے۔

ہلتھ سب سنٹر مانکل ماور میں پچھلے سات ماہ سے ملازمین غیر حاضر

میڈیا کی ٹیم نے جائزہ لیا تو سب سینٹر کھلا تو تھا لیکن یہاں چار ملازمین میں سے صرف ایک شخص صفائی کرمچاری ہی موجود تھا اور وہی کبھی کبھار لوگوں کے بلڈپریشر وغیرہ کی جانچ کرتا ہے۔

مقامی سرپنچ اورمقامی ڈی ڈی سی نے بات کرتے ہوئے بتایا کہ یہ ایک ستم ظریفی کی بات ہے۔ تاہم انہوں نے ملازمین کے خلاف کارروائی کرنے کی یقین دہانی کروائی۔

اس سلسلے میں جب اس نمائندے نے بی ایم او لنگیٹ سے بات کرنا چاہی تو انہوں نے فون اٹھانا بھی گورا نہیں کیا۔ اگر بعد میں اٹھایا تب بھی ہماری بات کا معقول جواب نہیں دیا۔