ترنمول کانگریس رہنما موسم بینظیرنور کورونا سے متاثر

مالدہ ضلع ترنمول کانگریس کی صدر اور راجیہ سبھا رکن موسم بینظیرنور کورونا مثبت پائے گئی ہیں، انہیں ہوم قرنطین میں رہنے کا مشورہ دیا گیا ہے۔

مغربی بنگال اسمبلی انتخابات 2021 کے دوران ریاست میں کورونا وائرس کی دوسری لہر بھی تیزسی پھیل رہی ہے۔ ریاست میں یومیہ ساڑھے آٹھ ہزار سے زائد کورونا وائرس کے نئے کیسز کی تصدیق ہو رہی ہے۔ گزشتہ چند دنوں کے دوران مغربی بنگال میں کورونا وائرس کے نئے کیسز کے آنے کی رفتار میں تیزی سے اضافہ ہوا ہے اس کے باوجود سیاسی سرگرمیاں جاری ہیں۔

کلکتہ ہائی کورٹ نے بھی الیکشن کمیشن سمیت تمام سیاسی جماعتوں کو انتخابی مہم کے دوران کورونا گائیڈ پر سختی سے عمل کرنے کی ہدایت دے چکی ہے۔

ترنمول کانگریس رہنما موسم بینظیرنور کورونا سے متاثر

مغربی بنگال کے مالدہ ضلع کی ترنمول کانگریس کی صدر اور راجیہ سبھا رکن موسم بینظیر نور کورونا مثبت پائی گئی ہیں۔ ڈاکٹروں نے کہاکہ موسم بینظیرنور کی حالت تشفی بخش ہے۔ انہیں گھر میں ہی قرنطین ہونے کا مشورہ دیا گیا ہے۔ ان کے رابطہ میں آنے والے لوگوں کو جانچ کرانے کی ہدایت دی گئی ہے۔ دوسری طرف ندیا ضلع کے کرشنا نگر جنوب سے رکن اسمبلی اور وزیر اجل بسواس اور شمالی 24 پرگنہ کے باراسات سے ترنمول کانگریس کے امیدوار سنجیو چٹرجی بھی کورونا مثبت پائے گئے ہیں۔شمالی دیناج پور کے گوال پوکھر سے ترنمول کانگریس سے موجودہ رکن اسمبلی و وزیر محمد غلام ربانی بھی کورونا سے متاثر ہیں۔ ذرائع کے مطابق ریاستی وزیر اجل بسواس اور ترنمول کانگریس کے امیدوار سنجیو چٹرجی کو کورونا مثبت پائے جانے کے بعد دونوں گھر میں قرنطین کا مشورہ دیا گیا ہے۔ اس سے قبل بی جے پی کی رکن پارلیمان (راجیہ سبھا) اور اداکارہ روپا گنگولی کے بھی کورونا وائرس میں مبتلا پائے جانے کی تصدیق ہوئی تھی۔ واضح رہے کہ مرشدآباد ضلع کے شمشیرگنج سے کانگریس کے امیدوار ریاض الحق اور آر ایس پی کے امیدوار پردیپ نندی کی کورونا وائرس کے سبب موت ہو چکی ہے۔