مغربی بنگال کے بیربھوم ضلع کے رام پور ہاٹ کے باگٹوئی گرام میں پیش آئے آتشزدگی کے واقعے کو لیکر اب حکومت پر دباؤ بڑھتا جا رہا ہے۔ وہیں دوسری جانب ترنمول کانگریس کے رہنماؤں کے اس معاملے میں ملوث ہونے کی بھی بات بھی سامنے آرہی ہے۔ خاص طور پر بیربھوم ضلع کے ترنمول کانگریس کے ہیوی ویٹ رہنما انوبرتو منڈل کو لیکر بھی سیاسی جماعتوں کی جانب اس معاملے میں ملوث ہونے کی بات کہی جا رہی ہے۔ Bengal Imams Association has Demanded the Arrest of the Accused in the Birbhum Violence Case
ادھر بنگال امام ایسوسی ایشن نے بھی اب اس معاملے کے لئے انوبرتو منڈل کو ذمہ دار ٹہراتے ہوئے انوبرتو منڈل کی گرفتاری کا مطالبہ کیا۔ بنگال امام ایسوسی ایشن کے چیئرمین محمد یحییٰ کا اس سلسلے میں کہنا ہے کہ رام پور آتش زنی کے دردناک واقعے سے ہم بہت رنجیدہ ہیں۔ اس واقعے کی وزیر اعلیٰ ممتا بنرجی کو ذمہ داری لینی چاہیے۔ محمد یحییٰ نے کہا کہ ووٹ سے قبل وزیر اعلیٰ ممتا بنرجی نے کہا تھا کہ اسمبلی الیکشن میں 294 سیٹوں پر وہی امیدوار ہیں۔ اس طرح سے وہی رام پور ہاٹ ودھان سبھا کی امیدوار ہوئیں اس دردناک واقعے کے لئے وہ بھی ذمہ دار ہیں اور وہ اس ذمہ داری سے بھاگ نہیں سکتی ہیں۔ غیر جانب دارانہ جانچ کے لئے ان کو بھی ذمہ داری قبول کرنی ہوگی۔
