شاردا گروپ سے لی گئی رقم ای ڈی کے سپرد

ترنمول کانگریس کی ممبر پارلیمنٹ وسابق اداکارہ شتابدی رائے نے شاردا گروپ سے لیے گئے روپے کو انفورسمنٹ ڈائریکٹوریٹ کو واپس کردی ہے۔

شاردا چٹ فنڈگھوٹالہ میں جانچ کا سامنا کررہی ہے ترنمول کانگریس کی ممبر پارلیمنٹ اور سابق اداکارہ شتابدی رائے نے شاردا گروپ کے برانڈ ایمبسڈر کے طور پر لی گئی رقم انفورسمنٹ ڈائریکٹوریٹ کو واپس کردی ہے۔
انچاس سالہ شتابدی رائے نے جولائی میں ای ڈی کو خط لکھ کر روپے واپس کرنے کی پیش کش کی تھی۔ بیر بھوم سے تین مرتبہ کی رکن پارلیمنٹ شتابدی رائے نے آج کہا ہے کہ میں نے 30.64لاکھ روپے کا ڈرافٹ ای ڈی کو بھیج دیا ہے۔ ای ڈی کے ایک اہلکار نے بھی ڈرافٹ موصول ہونے کی تصدیق کی ہے، تاہم اس پر تبصرہ کرنے سے انکار کردیا ہے۔
رائے ایک مشہور بنگالی اداکارہ ہے۔ اس سے قبل ترنمول کانگریس کے سابق راجیہ سبھا رکن اور مشہور بالی ووڈ اداکار متھن چکرورتی نے بھی شاردا گروپ سے لیے گئے 1.16کروڑ روپے ای ڈی کو2015میں واپس کیا تھا۔
بھارتیہ جنتا پارٹی کے بنگال یونٹ کے نائب صدر جے پرکاش مجمدار نے کہا کہ یہ کافی نہیں ہے۔
انہوں نے کہا کہ شتابدی رائے نے یہ رقم 2012-13میں لیا تھا مگر اب لوٹارہی ہیں۔جب کہ شاردا گروپ میں روپے جمع کرنے والے کئی افراد نے خودکشی کرلی۔کیا شتابدی رئے ان جانوں کو واپس لاسکتی ہیں۔اس لے رقم واپس کرنا کافی نہیں ہے او ر انہیں دوسری سزاؤں کا سامنا کرنے کیلئے تیار رہنا چاہیے۔شاردا چٹ فنڈ گھوٹالہ میں ترنمول کانگریس کے سینئر لیڈر و سابق ریاستی وزیر مدن مترا، سابق رکن پارلیمنٹ کنال گھوش دوسال سے زاید کا عرصہ جیل میں گزار چکے ہیں۔اس کے علاوہ سی بی آئی اور ای ڈی نے چٹ فنڈ گھوٹالہ میں ترنمول کانگریس کے کئی ریاستی وزراء اور ممبران پارلیمنٹ اور اسمبلی سے پوچھ تاچھ کرچکی ہے۔خیال رہے کہ شاردا چٹ فنڈگھوٹالہ کا حجم 24.60کروڑ روپے ہیں۔یہ گھوٹالہ پہلی مرتبہ2013میں سامنے آیا تھا اور شاردا گروپ کے چیرمین سدیپتو سین اور ان کی معاون دیب جانی کو جموں سے گرفتار کیا گیا تھا۔
شاردا گروپ کے تحت 100کمپنیاں چل رہی تھیں اور اس کے تحت ہزاروں ایجنٹ وابستہ تھے۔اس گروپ نے تین گنی رقم لوٹانے کے وعدے پر دیہی علاقوں سے بڑی تعداد میں روپے جمع کیے تھے۔