مغربی بنگال میں کورونا وائرس کی وجہ سے مرنے والوں کی تعداد پر جاری سیاسی بحث کے دوران بدھ کو سی پی آئی ایم نے دعویٰ کیا کہ بنگال میں کورونا وائرس کی وجہ سے 30افراد کی موت ہو چکی ہے جب کہ بنگال حکومت کا کہنا ہے کہ کورونا وائرس کی وجہ سے ریاست میں صرف 7افراد کی موت واقع ہوئی ہے۔
بی جے پی بھی لگاتار اس معاملے میں ترنمول کانگریس کی قیادت والی حکومت کی تنقید کر رہی ہے۔ بی جے پی کا الزام ہے کہ ترنمول کانگریس کوروناوائرس کے مریضوں اور اس کی وجہ سے مرنے والوں کی تعداد کو چھپا رہی ہے۔
سی پی ایم کے ترجمان ”گن شکتی“ نے ذرائع کا حوالہ دیتے ہوئے دعویٰ کیا ہے کہ ’’ریاست میں 13اپریل تک کورونا وائرس کی وجہ سے 25افراد کی موت ہوئی تھی جب کہ گزشتہ دو دنوں میں کورونا وائرس کی وجہ سے مزید 5افراد کی موت واقع ہوئی ہے۔‘‘
وزیرا علیٰ ممتا بنرجی نے بدھ کو کورونا وائرس سے متعلق افواہ پھیلانے والوں کے خلاف سخت کارروائی کرنے کی وارننگ دی ہے۔ ممتا بنرجی نے کہا کہ کچھ لوگ کورونا وائرس کو لے کر سیاست کر رہے ہیں اور عوام میں خوف پھیلانے کی کوشش کر رہے ہیں۔
گن شکتی میں شائع خبر کا حوالہ دیتے ہوئے ممتا بنرجی نے کہا کہ ”کچھ لوگ (پر کشش) ہیڈ لائن بنانے کیلئے غلط معلومات فراہم کر رہے ہیں۔ میں ہر ایک کو وارننگ دیتی ہوں کہ ان کے خلاف کارروائی کی جائے گی۔‘‘
انہوں نے کہا کہ سپریم کورٹ نے بھی غلط معلومات فراہم کرنے والوں کے خلاف کارروائی کرنے کو کہا ہے۔ ممتا بنرجی نے کہا کہ ’’بنگال میں کورونا وائرس کی وجہ سے مرنے والوں کی شناخت میں خودد نہیں کرتی ہوں بلکہ اس کیلئے ڈاکٹروں کی ایک ٹیم ہے اور وہی مرنے والوں کی تعداد بتاتی ہے۔‘‘
ترنمول کانگریس کی ترجمان سنیہا سیش چکرورتی نے کہا کہ ’’سی پی ایم اور بی جے پی لوگوں میں خوف پھیلانے کیلئے افواہ بازی کر رہی ہے۔‘‘
گزشتہ روز بی جے پی کے جنرل سیکریٹری کیلاش وجے ورگی نے کہا تھا کہ ’’بنگال کے ایک اسپتال میں چار لاشیں رکھی ہوئی ہیں مگر حکومت یہ دعویٰ کر رہی ہے کہ ان لوگوں کی موت کورونا وائرس کی وجہ سے نہیں ہوئی ہے۔‘‘
ورگی نے ٹوئیٹ کرتے ہوئے کہا کہ ’’ایم آر بانگور اسپتال کے آئسولیشن وارڈ میں چار لاشیں ہیں۔‘‘ انہوں نے سوال کیا کہ ’’ان لوگوں کے کورونا وائرس کی جانچ ہوئی ہے یا نہیں؟ اگر ان کی موت کورونا وائرس کی وجہ سے نہیں ہوئی ہے تو پھر لاش رشتہ داروں کے حوالے کیوں نہیں کیا جا رہی ہے۔‘‘
