کولکاتا:ممتا بنرجی نے ایک انتخابی جلسے سے خطاب کرتے ہوئے کہا کہ ایک ایسے وقت میں جب بنگال میں انتخابات ہورہے ہیں وزیر اعظم مودی بنگلہ دیش جاکر بنگال سے متعلق بولتے ہیں اور بنگال کے ووٹروں کو لبھانے کے لیے کام کرتے ہیں یہ ضابطہ اخلاق کی مکمل خلاف ورزی ہے۔'
ترنمول کانگریس کی سربراہ نے کہاکہ '2019کے لوک سبھا انتخابات میں جب ایک بنگلہ دیشی اداکار ہماری ریلی میں شریک ہوگیا تو بی جے پی نے بنگلہ دیش حکومت سے بات کی اور ویزا منسوخ کرادیا۔ جب یہاں پولنگ جاری ہے، آپ لوگوں کے ایک حصے سے ووٹ مانگنے بنگلہ دیش جاتے ہیں، آپ کا ویزا کیوں منسوخ نہیں کیا جانا چاہیے؟ ہم الیکشن کمیشن سے شکایت کریں گے۔
ممتابنرجی جو مشرقی مدنی پور ضلع کے نندی گرام سے الیکشن لڑ رہی ہیں، انہوں نے الزام لگایا کہ بی جے پی نے بڑے پیمانے پر نندی گرام میں باہر سے لاکر غنڈوں کو جمع کیا ہے۔ بی جے پی ان غنڈوں کے ذریعہ انتخابات میں گڑبڑی پیدا کرنے کی کوشش کررہی ہے۔
وزیر اعلی نے ادھیکاری کنبے کو 'غدار' قرار دیتے ہوئے دعوی کیا ہے کہ گھر کے ایک رکن کو جمعہ کی رات لوگوں کے درمیان رقم تقسیم کرتے ہوئے دیکھا گیا تھا۔
انہوں نے کہا کہ صرف وزیر اعظم کی داڑھی بڑھ رہی ہے، معیشت نہیں۔ انہوں نے کہا کہ وہ اپنے آپ کو ویویکانند کہتے ہیں، بعض اوقات وہ کہتے ہیں کہ وہ رابندر ناتھ ٹیگور ہیں اور اب اس نے اپنے نام سے ایک اسٹیڈیم کا نام رکھ لیا ہے۔ انہوں نے کہا کہ کوئی لمبی داڑھی سے ٹیگور نہیں بن جاتا ہے۔ ممتا بنرجی نے کہاکہ مودی خودپسندی کے شکار ہیں۔ ہرجگہ اپنا نام رکھ رہے ہیں۔ ایک دن آئے گا جب ملک کا نام ہی نریندر مودی ہوجائے گا۔'
یواین آئی
