ریاست مغربی بنگال کی حکمراں جماعت ترنمول کانگریس کے رکن اسمبلی اور وزیر اندرا نیل سین نے کہا کہ مغربی بنگال میں کوئی سیاسی اتھل پتھل نہیں ہے۔
انہوں نے کہا کہ 'جو لوگ سیاسی اتھل پتھل کرنے کی کوشش میں مصروف ہیں انہیں اپنے مقصد میں میں کبھی بھی کامیابی نہیں ملے گی۔۔
رکن اسمبلی کا کہنا ہے کہ بنگال کے عوام کس بنیاد پر بیرونی ریاستوں سے آنے والے بی جے پی کے رہنماوں کی حمایت کریں گے؟
ترنمول کا نگریس کی سربراہ اور وزیراعلیٰ ممتابنرجی نے گزشتہ دس برسوں میں بنگال کی ترقی کے لیے جو کچھ کیا وہ ناقابل فراموش ہے۔
ممتا کے دور اقتدار سے قبل مغربی بنگال کے بجٹ میں چھ گنا اضافہ ہوا ہے جو واضح طور پر دکھائی دیتا ہے۔
مغربی بنگال واحد ریاست ہے جہاں اقلیتوں کے لیے سب سے زیادہ بجٹ مختص کیا جاتا ہے، اس کے علاوہ آدی واسیوں، راج بنسی اور متوا سماج کے لیے ترقیاتی فنڈ جاری کیا جاتا ہے۔
انہوں نے کہا کہ مغربی بنگال میں ترقیاتی کام واضح طور پر دکھائی دیتا ہے لیکن سیاست کرنے والوں کو یہ سب نظر نہیں آتا ہے۔
ترنمول کانگریس کے رکن اسمبلی نے دعویٰ کیا کہ جن ریاستوں سے مغربی بنگال کے خلاف آواز اٹھتی ہے وہاں اور یہاں کا موازنہ کرلیا جائے تو دودھ کا دودھ اور پانی کا پانی ہو جائے گا۔
انہوں نے کہا کہ میرے کہنے کا مطلب یہ نہیں ہے کہ گزشتہ دس برسوں میں ہماری حکومت نے کیا کیا مقصد یہ ہے کہ تنقید کرنے والوں کو اصل بات بتانی ہے تاکہ وہ لوگوں کو گمراہ نہ کرسکے۔
