مغربی بنگال میں کورونا وائرس کی دوسری لہر کا قہر جاری ہے۔ کورونا کے بڑھتے ہوئے نئے کیسز کے سبب عام لوگوں میں ڈر کا ماحول ہے۔
مغربی بنگال حکومت ریاست میں کورونا وائرس کے بڑھتے ہوئے کیسز کے مدنظر یک بعد دیگرے سخت فیصلے لے رہی ہے۔ ریاستی حکومت نے عوام سے کورونا گائیڈ لائن پر سختی سے عمل کرنے کی اپیل کی ہے اور ساتھ ہی متبنہ بھی کیا ہے کہ اگر کورونا وائرس قابو میں نہیں آیا تو لاک ڈاؤن ہی واحد راستہ ہوگا۔
ممتا بنرجی کی قیادت والی ریاستی حکومت کی کڑی یدایت کے بعد بیشتر علاقوں خاص طور پر اقلیتی طبقے کی گھنی آبادی والے علاقوں میں کورونا گائیڈ لائن پر سختی سے عمل کیا جا رہا ہے۔
دوسرے علاقوں کے مقابلے اقلیتی طبقے والے علاقوں میں رہنے والے لوگوں میں کورونا گائیڈ لائن پر سختی سے عمل کرنے کو لے کر خاصی دلچسپی پائی جا رہی ہے۔
رمضان المبارک کا مہینہ جاری ہے اور عید بالکل قریب ہونے کے باوجود اقلیتی طبقے کے لوگ کورونا گائیڈ لائن کو زیادہ ترجیح دے رہے ہیں۔ حکومت کی جانب سے مقررہ اوقات میں ہی بازار کھل رہے ہیں لوگ خریداری کے لیے پہنچ رہے ہیں۔
واضح رہے کہ وزیراعلیٰ ممتا بنرجی نے پہلے ہی انتباہ دے دیا ہے کہ 15 دنوں کے اندر اگر حالات میں بہتری نہیں آتی ہے تو ہمارے پاس لاک ڈاؤن نافذ کرنے کے سوا کوئی دوسرا راستہ نہیں ہوگا۔
ریاستی حکومت کی جانب سے گزشتہ 48 گھنٹوں کے اندر اندر دو کورونا گائیڈ لائنز جاری کی جا چکی ہیں جس پر عوام کو ہر حال میں عمل کرنے کی ہدایت دی گئی ہے۔
دوسری طرف ریاست میں جزوی لاک ڈاؤن جاری ہے۔ کورونا گائیڈ لائن کے تحت دن بھر میں صرف گھنٹے ہی بازار، دکانیں کھلی رہیں گی۔
