مغربی بنگال میں بی جے پی کے پوسٹر بوائے شھبندو ادھیکاری نے وزیراعلیٰ ممتا بنرجی پر ایک بار پھر کڑی تنقید کی۔ انہوں نے ممتابنرجی کی بات دوہراتے ہوئے کہا کہ کورونا وائرس کے خلاف جنگ کسی ایک ریاست یا پھر کسی ایک شخص کی نہیں ہے بلکہ پورے ملک کی ہے۔
انہوں نے کہا کہ مغربی بنگال کو چھوڑ کر ملک کی تمام ریاستیں اس وقت مرکزی حکومت کے ساتھ قدم سے قدم ملا کر کورونا وائرس سے نمٹنے کی کوشش میں مصروف ہیں۔ شھبندو ادھیکاری کا کہنا ہے کہ ورچوئل کانفرنس کے دوران وزیراعظم نریندر مودی نے 7 میں سے 5 غیر بی جے پی حکومت والی ریاستوں کے وزرائے اعلیٰ اور ضلع مجسٹریٹ سے بات چیت کی۔وزیراعظم کے کانفرنس میں تمام لوگوں کو اپنے اپنے خیالات کے اظہار کا موقع ملا، لیکن ممتابنرجی کہتی ہیں کہ ورچوئل کانفرنس کے دوران کسی کو بولنے کا موقع نہیں ملا۔ شھبندو ادھیکاری نے کہا کہ اس طرح کی بیان بازی سیاسی ہتھکنڈہ سے زیادہ کچھ نہیں ہے۔ بی جے پی رہنما کا کہنا ہے کہ بنگال کی وزیراعلیٰ ممتا بنرجی کو موجودہ حالات میں سمجھداری کا مظاہرہ کرنا چاہئے کیونکہ اس وقت ملک نازک دور سے گزر رہا ہے۔
واضح رہے کہ وزیراعظم نریندر مودی کے ورچوئل کانفرنس کے بعد وزیراعلیٰ ممتا بنرجی نے کہا کہ کانفرنس کے دوران انہیں بولنے کا موقع نہیں دیا گیا۔ انہوں نے مزید کہا کہ کانفرنس میں ایک ہی شخص کو بولنا ہے تو دوسروں کو بلانے کی کیا ضرورت ہے۔
