مغربی بنگال کے سات اضلاع کی 44 اسمبلی نشستوں میں سیکورٹی کے سخت انتظامات کے درمیان چوتھے مرحلے کی ووٹنگ کا سلسلہ جاری ہے۔
حکمران جماعت ترنمول کانگریس سمیت تمام اپوزیشن جماعتوں نے چوتھے مرحلے میں شاندار کارکردگی کا مظاہرہ کرنے کے لئے اپنی اپنی پوری طاقت جھونک دی ہے۔
چوتھے مرحلے کی ووٹنگ کے دوران جنوبی 24 پرگنہ کے بھانگوڑ میں انڈین سیکولر فرنٹ کے بانی پیرزادہ عباس صدیقی کے بھائی نوشاد صدیقی (امیدوار) کو مقامی باشندوں کی مخالفت کا سامنا کرنا پڑا۔
بھانگوڑ میں پولنگ اسٹیشن کے قریب مقامی باشندوں نے انڈین سیکولر فرنٹ کے امیدوار نوشاد صدیقی کے خلاف احتجاج کیا اور ناکہ بندی کر دی۔ مظاہرین میں خواتین بھی شامل تھیں۔
مقامی باشندوں کا ماننا ہے کہ انڈین سیکولر فرنٹ کے رہنما نوشاد صدیقی کی وجہ سے علاقے میں کشیدگی پھیلی ہے۔ مقامی باشندوں نے آئی ایس ایف کے رہنما نوشاد صدیقی کے خلاف کارروائی کا مطالبہ کیا ہے۔ اس کے ساتھ ساتھ ان پر علاقے میں گھومنے پر پابندی عائد کرنے کی بھی اپیل کی ہے۔
دوسری جانب نوشاد صدیقی نے کہا ہے کہ ’’یہ کوئی بڑی بات نہیں ہے، ترنمول کانگریس کے کہنے پر چند لوگوں نے احتجاج کیا، اس سے ہم پر کوئی اثر پڑنے والا نہیں ہے۔'
