ریاست مغربی بنگال کے دارالحکومت کولکاتا سے متصل ضلع ہوڑہ کے بالی اسمبلی حلقے سے ترنمول کانگریس کے سرگرم رہنما واصف اختر نے ای ٹی وی بھارت سے گفتگو کرتے ہوئے ضلع میں موجودہ سیاسی صورتحال پر تبادلہ خیال کیا۔
انہوں نے کہا کہ ممتا بنرجی کی قیادت والی حکمراں جماعت ترنمول کانگریس کو عوام اسمبلی انتخابات میں کامیابی دلائے گی، کیونکہ حالات سازگار ہیں اور ترنمول کانگریس کی سربراہ ممتا بنرجی کی حمایت میں بھی ہیں، اس لیے امید ہے کہ اس مرتبہ ہوڑہ ضلع میں بی جے پی کو ایک بھی سیٹ نہیں ملے گی۔
ترنمول کانگریس کے رہنما ڈاکٹر واصف اختر نے کہا کہ ہوڑہ ضلع کے تمام سولہ اسمبلی سیٹز جیتنے کی امید ظاہر کی ہے، ترنمول کانگریس کو ضلع کی تمام سیٹوں پر کامیابی ملتی ہے تو اس میں کوئی حیرت کی بات نہیں ہوگی۔
ترنمول کانگریس کے رہنما کا کہنا ہے کہ بی جے پی کے تمام اعلیٰ رہنما بنگال آجائیں، اس کے باوجود انہیں کامیابی نہیں ملے گی کیونکہ انہیں عوام کی حمایت حاصل نہیں ہے، انہوں نے کہا کہ گزشتہ دس برسوں کے دوران ممتا بنرجی نے مسلمانوں کے لیے کافی کام کیا ہے، ان کے کاموں کی وجہ سے ہی اقلیت طبقوں کے درمیان مقبول ہے۔
انجمن ترقی اردو کے کنوینر ڈاکٹر واصف اختر کا کہنا ہے کہ مساجد کے امام و مؤذن کو وظیفہ ملنا کوئی معمولی بات نہیں ہے، اس کے علاوہ مسلم اکثریتی علاقوں میں حکومت کی جانب سے تمام تر سہولیات فراہم کی جاتی ہے جو اس سے قبل کبھی نہیں ملی۔
انہوں نے کہا کہ کانگریس اور لفٹ فرنٹ کے دور اقتدار میں اردو زبان کو دوسری سرکاری زبان کا درجہ دینے کی کوشش نہیں کی گئی لیکن ممتا بنرجی اقتدار میں آنے کے ایک سال کے اندر ہی اردو کو دوسری سرکاری زبان کا درجہ دیا گیا، عوام یہ سب دیکھتی ہے اس بنیاد پر ان کی جیت سو فیصد طے ہے۔
واضح رہے کہ مغربی بنگال اسمبلی انتخابات کی تاریخوں کا اعلان کیا جا چکا ہے، اس مرتبہ اسمبلی انتخابات آٹھ مرحلوں میں ہوں گے، پہلے مرحلے میں 27 مارچ کو ووٹ ڈالے جائیں گے، اور نتائج کا 2 مئی کو کیا جائے گا۔
