دارالحکومت دہلی میں وزیر داخلہ امت شاہ سے ملاقات کرنے کے بعد مغربی بنگال کے گورنر جگدیپ دھنکر نے ایک بار پھر ریاست کے اندرونی معاملات کو منظر عام پر لا کر ایک نیا تنازع کھڑا کر دیا ہے۔
گورنر جگدیپ دھنکر نے کہا کہ مغربی بنگال ملک کی واحد ریاست ہے جہاں ہر ضلع میں بم اور ہتھیار بنانے کے کارخانے موجود ہیں، ریاست میں پولیس انتظامیہ، خفیہ اداروں کے ہونے کے باوجود جرائم کا گراف ملک کی دوسری ریاستوں کے مقابلے کافی زیادہ ہے۔
ریاست کے مختلف اضلاع میں بم بنانے کے کارخانوں میں دھماکے ہوتے رہتے ہیں، انہوں نے کہا کہ میں صرف یہ جاننا چاہتا ہوں کہ ڈی جی پی کا کوئی رول ہے یا نہیں، ان کی موجودگی کے باوجود داخلہ سکیورٹی اتنی کمزور کیوں ہے۔
انہوں نے کہا کہ بیشتر اضلاع میں انتہا پسند تنظیموں کی سرگرمیاں عروج پر پہنچ چکی ہیں اور مغربی بنگال انتہا پسندوں کا محفوظ پناہ گاہ بن چکا ہے، اگر اس پر جلد قابو نہیں پایا گیا تو عام لوگوں کو پریشانیوں کا سامنا کرنا پڑ سکتا ہے۔
انہوں نے کہا کہ آج وزیر داخلہ امت شاہ سے ملاقات کے دوران مغربی بنگال کی داخلہ سکیورٹی کو لے کر تبادلہ خیال کیا گیا۔
مزید پڑھیں: بردوان میں جے پی نڈا کا روڈ شو
