ریاست مغربی بنگال میں رواں برس ہونے والے اسمبلی انتخابات سے قبل سیاسی جماعتوں کی سرگرمیوں میں اضافہ ہونے کے ساتھ ساتھ تیاریاں بھی زوروں پر جاری ہیں۔
حکمراں جماعت ترنمول کانگریس اندرونی خلفشار کو دور کرنے اور پارٹی کے ناراض رہنماؤں کو منانے کی کوشش میں مصروف ہے، اسمبلی انتخابات سے قبل کانگریس اور لیفٹ فرنٹ نشستوں کی تقسیم کے مسئلے کو حل کرنے کے لیے مسلسل مشترکہ اجلاس منعقد کر رہے ہیں۔ اسی درمیان علیم الدین اسٹریٹ میں واقع سی پی آئی ایم کے ریاستی صدر دفتر سے موصولہ اطلاع کے مطابق ٹویٹر نے سرکردہ رہنما محمد سلیم کے ٹویٹر اکاونٹ کو بلاک کر دیا ہے۔
انہوں نے کہا کہ آج شام محمد سلیم کے ٹویٹر اکاؤنٹ کو بلاک کرنے کی اطلاع موصول ہوئی، کسان تحریک کی حمایت میں ٹویٹ کرنے پر ان کا ٹویٹر اکاؤنٹ بلاک کیا گیا ہے۔
سی پی آئی ایم نے محمد سلیم کے ٹویٹر اکاؤنٹ بلاک کرنے کی پر زور مذمت کرتے ہوئے اس قدم کو اظہار خیال کی آزادی کی خلاف ورزی قرار دیا ہے،
واضح رہے کہ سی پی آئی ایم کے سرکردہ رہنما اور پولیٹ بیورو کے رکن محمد سلیم کسان تحریک کی حمایت میں مسلسل ٹویٹ کرتے رہتے ہیں۔
