مغربی بنگال کی وزیراعلیٰ ممتا بنرجی نے پٹرول، ڈیزل اور گیس کی قیمتوں میں مسلسل اضافے کی وجہ سے مرکزی حکومت کے خلاف منفرد انداز میں احتجاج کیا۔
احتجاج کرتے ہوئے ممتا نے الکٹرک اسکوٹر کی سواری کرکے دفتر پہنچی اور شام کو اسی اسکوٹر پر سوار ہوکر گھر بھی گئیں۔
احتجاج کے دوران وزیراعلیٰ نے گجرات کے موٹیرا کرکٹ اسٹیڈیم کا نام تبدیل کرکے نریندر مودی رکھنے پر تنقید کرتے ہوئے کہا کہ یہ صرف نام بدلنے میں ماہر ہیں۔ اسٹیڈیم کا نام بدل دیا گیا کسی دن ہم دیکھیں گے انہوں نے ملک کا نام بھی بدل دیا ہے۔
انہوں وزیر اعظم نریندر مودی کے کئی سرکاری کمپنیوں کو فروخت کرنے کے فیصلے کی بھی تنقید کی۔ اس کے علاوہ انہوں نے تیل کی قیمتوں میں اضافہ کے خلاف قومی سطح پر تحریک چلانے کی بھی بات کہی ہے اور کہا کہ کل سے ترنمول کانگریس تیل کی قیمتوں کے خلاف تحریک شروع کرے گی۔
انہوں نے مزید کہا کہ مودی ملک کو فروخت کر رہے ہیں۔ ممتا نے مزید کہا کہ یہ حکومت نئی نسل، مسلم، عوام، کسان اور خواتین مخالف ہے، اس کا خاتمہ بہت ضروری ہے۔
