ریاست بہار کے ضلع ارریہ میں مسلسل بارش کے سبب جہاں ایک طرف ندیوں میں طغیانی ہے وہیں دوسری جانب پانی کے تیز بہاؤ کے سبب ایک 18 سالہ نوجوان ندی میں ڈوب گیا۔
ڈوبنے کی خبر ملتے ہی مقامی لوگ موقع پر دوڑ پڑے، اطلاع ملتے ہی نگر تھانہ کے ایس ایچ او کنگ کندن بھی پولیس اہلکاروں کے ساتھ جائے وقوع پر پہنچے اور حالات کا جائزہ لیا۔
کشتی کے سہارے ڈوبنے والے نوجوان کی کھوج بین جاری ہے، تادم تحریر اب تک نوجوان کی برآمدگی نہیں ہو سکی ہے۔
آپ کو بتا دیں کہ' مذکورہ واقعہ کھریا بستی سے بانسباڑی جانے والی سڑک کے درمیان کا ہے، نوجوان کا نام محمد ساجد ولد محمد سجاد ہے جو کھریا بستی کا رہنے والا تھا۔
ساجد سڑک پر بہہ رہے پانی سے موٹر سائیکل دھو رہا تھا، اتنے میں پانی کے تیز بہاؤ سے ساجد کا پاؤں پھسل گیا اور گاڑی سمیت وہ پانی کے اندر چلا گیا، مقامی لوگ اسے بچانے کی غرض سے دوڑے لیکن پانی کے بہاؤ میں دور جا چکا تھا۔
کھریا بستی کے مکھیا نمائندہ معصوم رضا نے کہا کہ اس سڑک پر ہر برس حادثہ پیش آتا ہے پھر بھی انتظامیہ کی جانب سے بے توجہی برتی جاتی ہے، ابھی بارش کے پیش نظر ارریہ ریڈ ژون میں ہے۔
مزید پڑھیں:'جرائم اور بے روزگاری کا مرکز بن چکا ہے بہار'
مسلسل بارش کے سبب سڑکوں پر پانی بہہ رہا ہے ان سب کے باوجود ضلع انتظامیہ نے سڑک کے دونوں جانب سے بیریکٹنگ نہیں کی ہے، ضلع انتظامیہ نے اگر توجہ کی ہوتی تو شاید یہ حادثہ پیش نہیں آتا۔
