عام طور پر مساجد اور مدارس کے تعمیراتی کام سفیر کے ذریعہ لائے گئے چندے، بیرون ممالک سے آنے والے فنڈ یا پھر رسوخ دار لوگوں کی مدد سے ہوتے ہیں، لیکن کشن گنج ضلع کی سب سے بڑی مسجد کی تعمیر گاؤں والوں کے آپسی تعاون سے کی جا رہی ہے۔
مسجد ضلع کے کوچادھامن حلقہ میں واقع کٹھامٹھا پنچایت میں بن رہی ہے، جس کا نام جامع مسجد تکیہ شریف کٹھا مٹھا رکھا گیا ہے۔
بتا یا جا رہا ہے کہ اس مسجد کا شمار نہ صرف کشن گنج، بلکہ سیمانچل کی سب سے بڑی اور مثالی مسجد میں کیا جائے گا۔
اس سلسلے میں مزید بتاتے ہوئے مسجد کمیٹی کے صدر اظہار صفی کہتے ہیں، کہ زمانہ قدیم میں یہاں بشیر الدین نام کے ایک پیر صاحب آئے تھے، جنہوں نے اس کی سنگ بنیاد رکھی تھی، تب مسجد بہت چھوٹی تھی،لیکن اب تعمیر نو کے ذریعے اسے مزید وسیع بنایا جارہا ہے۔
کمیٹی صدر بتاتے ہیں کہ مسجد پچھلے چار برس سے زیر تعمیر ہے، جس کی چھت کی ڈھلائی بہت جلد ہو جائیگی۔
انہوں نے کہا کہ اب تک جتنے اخراجات ہوئے ہیں، گاوں والوں نے مل کر کئے ہیں، آگے بھی یہی کوشش رہےگی، کہ مسجد تعمیر کی چندہ کے لئے باہر نہ جانا پڑے۔
