اتراکھنڈ: لاک ڈاؤن میں پھنسے کشمیری تاجروں میں غلہ تقسیم

لاک ڈاؤن میں اودھم سنگھ نگر کاشی پور میں مقیم 15 کشمیری عوام کو پولیس نے راشن فراہم کیا ہے۔آپ کو بتادیں کہ ہر برس موسم سرما میں یہ کشمیری تاجر اتراکھنڈ کے بہت سے شہروں میں گرم کپڑے، شال اور خشک میوے فروخت کرنے آتے ہیں۔

ریاست اتراکھنڈ میں کورونا وائرس کے سبب لاک ڈاؤن کے درمیان ایک طرف پولیس اور دوسری سماجی تنظیمیں غریب اور بے سہارا لوگوں کو دو وقت کا کھانا مہیا کررہی ہیں۔

کورونا وائرس پھیلنے اور لاک ڈاؤن کی وجہ سے کشمیری تاجر ریاست کے بہت سے علاقوں میں پھنسے ہوئے ہیں۔

اودھم سنگھ نگر کاشی پور کے ایڈیشنل سپرنٹنڈنٹ پولیس راجیش کمار بھٹ نے کاشی پور علاقے میں پھنسے 15 کشمیری تاجروں کو راشن فراہم کیا ہے۔

اس دوران ایڈیشنل سپرانٹنڈنٹ پولیس راجیش بھٹ نے بتایا کہ کاشی پور کے جسپور خورد میں مقیم سبھی 15 کشمیری تاجروں کو بلاکر راشن مہیا کرایا گیا ہے یہ لوگ جب تک یہاں ہیں ان کو ہر طرح کی سہولت دی جائے گی۔