ضلع یادگیر کے تعلقہ شاہ پور کے دیہات نیکل میں ہزاروں ایکڑ کی کھیتی میں ندی کا پانی جمع ہونے کی وجہ سے کئی کھیت تالاب میں تبدیل ہو چکے ہیں۔
کھیتوں میں دیکھنے پر دور دور تک صرف پانی ہی پانی نظر آ رہا ہے۔
کھیتوں کی فصلیں تباہ و برباد ہو چکی ہیں۔
محبوب نامی مقامی کسان نے ای ٹی وی بھارت سے بات کرتے ہوئے کہا کہ گذشتہ دس سے بارہ سالوں میں پہلی بار اس طرح ندی کا پانی دیہات میں داخل ہوا ہے، جس کی وجہ سے چار سے پانچ ہزار ایکڑ زرعی زمین پر موجود فصلیں برباد ہو چکی ہیں۔
گاؤں کے کسانوں کو ہزاروں روپے کا نقصان ہوا ہے اور فی الحال گاؤں کے کسان بہت پریشان حال ہیں۔
انہوں نے مزید کہا کہ یہاں کی اکثر فصلیں جوار اور کپاس کی تھی، جو پوری طرح ختم ہو چکی ہیں۔
لاک ڈاؤن کے بعد کسان پریشانی سے نکلنے کی کوشش کر رہے تھے تبھی بارش کے قہر نے انہیں پوری طرح توڑ کر رکھ دیا۔
کسانوں نے ریاستی حکومت اور ضلع انتظامیہ سے سرکاری مدد دینے کی اپیل کی ہے۔
