کرناٹک کے ضلع گلبرگہ سے ایمس کی برانچ کو ہبلی دھارواڑ ضلع منتقل کیے جانے کی وجہ سے گلبرگہ کے لوگوں میں ناراضگی پائی جا رہی ہے۔
گلبرگہ ڈیولپمنٹ اتھارٹی کے اضغر چلبل نے ای ٹی وی بھارت کو بتایا کہ مرکزی و ریاستی حکومتوں نے عرصہ دراز سے مشہور علاقے گلبرگہ کے کئی ایک اہم دفاتر اور ترقیاتی کاموں و پرجیکٹو ں کو دوسرے اضلاع میں منتقل کرنے کا سلسلہ شروع کردیا ہے۔ اس کے خلاف علاقے کے عوام میں سخت ناراضگی پائی جارہی ہے۔
انھوں نے کہا کہ پہلے غذائی مرکز، سینٹر فار ایکسیلینسی، ٹیکسٹائیل پارک، ریلوے ڈویژن اور اب آل انڈیا انسٹیٹیوٹ آف میڈیکل سائنس کو ہبلی دھارواڑ ضلع میں منتقل کرنے کا اعلان کیا گیا ہے، جو اس علاقے کے عوام کے ساتھ دھوکہ ہے۔
انھوں نے مزید کہا کہ گلبرگہ کی ترقی کے لیے اس علاقے کے تمام بی جے پی کے ارکان پارلیمنٹ و اسمبلی سمیت دوسرے رہنماؤں کو ایک ساتھ مل کر مرکزی حکومت پر دباو بنانا چاہیے کہ وہ اپنے اس فیصلے کو واپس لے۔
