جموں و کشمیر کے ضلع پلوامہ کے گانگواہ علاقے کے نوجوانوں نے ضلع ہسپتال کے اشتراک سے ایک خون عطیہ کیمپ کا انعقاد کیا۔ کیمپ میں آکر علاقے کے نوجوانوں نے اپنا خون عطیہ کیا۔ کیمپ میں کافی تعداد میں نوجوانوں نے شرکت کی۔ انڈین سسٹم آف میڈیسن کی جانب سے علاقے میں ایک مفت طبی کیمپ کا بھی انعقاد عمل میں آیا۔ اس میڈیکل کیمپ میں علاقے کے لوگوں کو مفت طبی سہولیات فراہم کی گئی ساتھ ہی مفت ادویات بھی تقسیم کی گئیں، اس مفت طبی کیمپ میں علاقے کے لوگوں نے بڑھ چڑھ کر حصہ لیا۔
خون عطیہ کرنے والے نوجوان اختر عباس نے کہا کہ 'محرم الحرام کے ایام جاری ہیں اور ہر کوئی چاہتا ہے کہ میں کسی طرح امام عالی مقام کو خراج عقیدت پیش کروں اور اس خون عطیہ کیمپ کا انعقاد اسی خراج عقیدت کی ایک کڑی ہے اور ہم جو خون کا عطیہ دے رہے ہیں یہ ضرورت مندوں کے کام آئے گا۔ خون عطیہ کرنے والے دوسرے نوجوان شیخ محمد مقبول نے کہا کہ خون عطیہ کرکے ہم شہدائے کربلا کو خراج عقیدت پیش کر رہے ہیں اور امام عالی مقام کا یہی درس بھی ہے کہ 'ایک انسان دوسرے انسان کے کام آئے'۔
مزید پڑھیں: جموں و کشمیر میں تمام تعلیمی ادارے تا حکم ثانی بند رہیں گے
اس تعلق سے قمر رضوان نوری نے کہا کہ 'امام حسینؓ نے اپنے ساتھیوں سمیت کربلا میں اسلام کی سربلندی کے لئے اپنی جانیں قربان کیں اور خون کے عطیہ کا مقصد ہے کہ ہم بھی کسی کی جان بچا سکیں جس کا درس امام حسینؓ نے واقعہ کربلا میں دیا۔
