اندور: مسلم طلباء سے تفریق کیے جانے کے خلاف کانگریس نے دیا میمورنڈم

مدھیہ پردیش کے اندور شہر میں حال ہی میں بارہویں کے امتحانات میں شامل اقلیتی مسلم طلباء اور طالبات کے ساتھ تفریق اور تعصب کا معاملہ زور پکڑتا جا رہا ہے۔ ایک بنگالی اسکول میں کلاس کے بجائے باہر بیٹھا کر امتحان لیے جانے سے سیاسی، سماجی اور مسلم حلقوں میں کافی ناراضگی ہے-

مدھیہ پردیش کانگریس کمیٹی کے جنرل سکریٹری محمد سلیم نے آج گورنر ہاؤس جا کر ریاست کے گورنر کی عدم موجودگی میں گورنر کے سکریٹری کو میمورنڈم پیش کر کے قصورواروں کے خلاف کارروائی کرنے کا مطالبہ کیا-

غور طلب ہے کہ محمد سلیم کے ذریعہ پیش کردہ میمورنڈم میں مطالبہ کیا گیا ہے کہ مسلم طلباء و طالبات تفریق اور تعصب کا شکار نہ بنائے جائیں۔ اندور کے بنگالی اسکول کو محکمہ تعلیم کے ذریعہ امتحان سینٹر بنایا گیا تھا۔ اس اسکول میں اسلامیہ کریمیہ اسکول کے طلباء و طالبات امتحان دینے کے لیے آئے تھے- جب یہ طلباء امتحان دینے پہنچے تو وہاں کے منتظمین نے مسلم طلبا و طالبات کو امتحان ہال میں نہیں گھسنے دیا اور کچھ بچوں کے ذریعہ احتجاج کرنے پر منتظمین نے انہیں باہر برآمدے میں بٹھا کر امتحان دلوایا تھا -